Ils locataris duain prender resguard da las autras persunas en chasa sco er da la vischinanza. Uschia èsi fixà en il dretg da locaziun. En la gronda part dals edifizis da locaziun regla supplementarmain l'urden da chasa, cura e quant ditg che Vus dastgais per exempel far musica.
Temps da paus en Svizra
En blers lieus vala il ruaus da notg da las 22.00 fin las 06.00. Durant quellas uras èn scumandadas activitads canerusas sco per exempel sunar battaria u furar. En la gronda part dals lieus vala quai er durant il ruaus da mezdi (da las 12.00 fin las 13.00) sco er las dumengias ed ils firads.
Quai pudais Vus far en cas da disturbis dal ruaus
Cura che canera vala sco mulestanta, n'è betg reglà cleramain.
Sche Vus As sentis mulestà, tschertgai il discurs. Sche quai na gida nagut, infurmai en scrit l'administraziun d'immobiglias. Sch'i vegn fatg repetidamain canera en Vossa vischinanza, telefonai a la polizia u al numer d'urgenza 117.
A partir d'ina tscherta intensitad po la canera – ord vista giuridica – esser ina mancanza da l'object da locaziun, per exempel, cura che la canera da construcziun dura ditg. En tals cas pudais Vus supplitgar l'administraziun d'immobiglias d'eliminar la mancanza entaifer in termin adequat, per exempel 14 dis, u pretender ina reducziun dal tschains da locaziun. Sch'il locatur na reagescha betg, pudais Vus As drizzar a l'autoritad da mediaziun
Motivs per ina reducziun dal tschains da locaziun
Sch'il tschains da referenza vegn reducì. Actualmain importa el 1,5 %.
Sche Vossa relaziun da locaziun sa basa sin in tschains da locaziun pli aut ch'il tschains da referenza actual.
Sut tschertas premissas pudais Vus pretender entaifer 30 dis suenter che Vus essas ids a star en Vossa abitaziun, ch'il tschains da locaziun vegnia controllà. Uschia per exempel, sche Vus constatais, che Vus pajais almain 10 % dapli ch'il locatari anteriur.
Sche l'utilisaziun da l'abitaziun è pregiuditgada pervia d'ina mancanza. Exempels èn in furn che na funcziuna betg, ina temperatura dals locals memia bassa, ina renovaziun en l'edifizi u in disturbi da canera.
Uschia pretendais Vus ina reducziun dal tschains da locaziun
Tramettai ina brev recumandada a Voss locatur . Sche Vus n'avais betg survegnì ina resposta entaifer 30 dis u avais survegnì ina resposta nuncuntentaivla, pudais Vus As drizzar a l'autoritad da mediaziun.
Ils locaturs dastgan da princip augmentar il tschains da locaziun, sche:
ils pretschs s'augmentan en general (chareschia)
la tariffa dal tschains da referenza ((Link BWO) è vegnida auzada,
ils custs da mantegniment e da gestiun èn s'augmentads (per exempel ils custs administrativs u las taglias sin immobiglias),
renovaziuns pli grondas cun meglieraziuns èn vegnidas fatgas.
Uschia sto il locatur infurmar
El sto As communitgar e motivar l'augment sin in formular uffizial.
El po auzar il tschains da locaziun pir sin il proxim termin da disditga.
L'augment sto arrivar tar Vus almain 10 dis avant il cumenzament dal termin da disditga ordinari.
Uschia calculesch jau l'augment dal tschains da locaziun
Cun il calculatur dal tschains da locaziun (LinkHEV Schweiz; Link Mieterinnen- & Mieterverband) pudais Vus controllar, sche l'augment è correct. Sche Vus avais dubis, pudais Vus As drizzar a l'autoritad da mediaziun cumpetenta.
Il dretg da locaziun differenziescha tranter:
Mancanzas gravantas: sche l'abitaziun è praticamain inabitabla, p.ex. perquai ch'in bischen d'aua è rut. En tals cas gravants po il locatari eventualmain disdir extraordinariamain il contract da locaziun.
Mancanza media: L'abitaziun è bain abitabla, ma sia utilisaziun è limitada, p.ex. en cas d'ina frestgera defecta.
Mancanza pitschna: segiranzas defectas, pairs electrics u isolaziuns isadas. Mancanzas pitschnas ston ils locataris per regla eliminar e pajar sezs.
Tge far en cas d'ina mancanza?
Mancanza cura ch'ins va a star en l'abitaziun
Insisti sin il fatg, ch'i vegnia fatga ina glista da mancanzas, cura che Vus giais a star en l'abitaziun da locaziun. La glista da mancanzas duess pia far part dal protocol da surdada da l'abitaziun u dal protocol da consegna da l'abitaziun.
Sche ulteriuras mancanzas sa mussan curt suenter che Vus essas ì a star en l'abitaziun, pudais Vus annunziar quellas en scrit al locatur, tut tenor il contract da locaziun tranter 10 e 30 dis pli tard.
Mancanzas durant la locaziun
Sch'i resultan mancanzas medias e gravantas, pudais Vus pretender ch'il locatur las elimineschia uschè svelt sco pussaivel. Annunziai las mancanzas uschè svelt sco pussaivel. Sch'i na capita nagut, tramettai ina reclamaziun da mancanzas ((Link Mieterverband)), pia ina brev recumandada cun ina descripziun exacta e cun ina fotografia da la mancanza sco er cun in termin adequat, p.ex. 14 dis, per l'eliminar.
Sch'il locatur n'eliminescha betg la mancanza entaifer il termin adequat, pudais Vus:
laschar eliminar sez ina mancanza media. Quai vul dir p.ex. incumbensar il servetsch da stgaudament e trametter il quint al locatur.
deponer il tschains da locaziun (tar in post inditgà dal chantun) e dumandar ina reducziun dal tschains da locaziun. Sche Vus faschais quai, ston vegnir observadas intginas cundiziuns e formalitads. L'autoritad da mediaziun po As gidar. Cun il deposit vala il tschains da locaziun sco pajà.