Dumandai Vossa patruna u Voss patrun per in di liber. Per regla avais Vus il dretg d'in di liber per midar chasa. Sche la distanza tar Voss nov dachasa è pli gronda, survegnis Vus sut circumstanzas pli ditg liber. 

Vossa partenza stuais Vus annunziar a temp a la veglia vischnanca da domicil – persunalmain al spurtegl u online sin eUmzugCH. Ed As annunziai – suenter avair fatg midada – uschè baud sco pussaivel tar Vossa nova vischnanca da domicil.

N'emblidai betg d'infurmar Voss furnitur d'electricitad, da gas e dad aua, per ch'il quintader vegnia legì giu.

Infurmai Voss purschider da telefon che Vus midias chasa (annunziar resp. desdir las colliaziuns da telefon, d'internet e da televisiun digitala).

Annunziar la midada d'adressa: Infurmai la banca, la patruna u il patrun, la cassa da cumpensaziun, la media u il medi, la dentista u il dentist, la cassa da malsauns, las assicuranzas, la chasa editura da la gasetta, uniuns e.u.v. davart Vossa nova adressa. Tar la Posta pudais Vus laschar trametter suenter la posta per in tschert temp.

Organisar in parcadi per il di da far midada: Per chargiar e stgargiar vegnis Vus probablamain a stuair parcar in vehichel per pli ditg davant Voss domicil vegl e/u nov. As infurmai tar l'administraziun da la chasa, tar la polizia u tar la vischnanca, sche Vus duvrais ina permissiun per quai. Er la polizia u in'autra autoritad As po gidar, che nagin auter auto na saja parcà il di da far midada davant Vossa veglia u nova chasa d'abitar. Il proceder è en mintga lieu in auter.

Sche Vus possedais in vehichel: Infurmai l'Uffizi per il traffic sin via da Voss nov chantun da domicil.

Sche Vus avais uffants che van a scola: Contactai las persunas d'instrucziun e l'autoritad da scola.

Sche Vus avais in chaun: Annunziai la partenza da Voss chaun a Vossa veglia vischnanca da domicil.

Sche Vus essas pensiunada resp. pensiunà u avais in'activitad da gudogn independenta: Infurmai la cassa da cumpensaziun da la AVS chantunala.

Sche Vus essas ina «persuna obligada da far servetsch»: Contactai l'autoritad chantunala dal militar, dal servetsch civil ((link)) u dal post da la protecziun civila cumpetent da la vischnanca da domicil veglia.