En cas ch’i na dat ni in testament ni in contract d’ierta, pon las ertavlas ed ils ertavels tenor lescha dumandar in attest d’ierta. Tut tenor è quai la dunna, l’um, la partenaria registrada, il partenari registrà, la figlialanza (ils uffants e lur figlialanza) u eventualmain ils geniturs u lur uffants (frars e soras).
En cas ch’igl exista in testament u in contract d’ierta, po l’attest d’ierta pir vegnir dumandà suenter l’avertura uffiziala tras l’autoritad responsabla.
Per survegnir in attest d’ierta stuais Vus tranter auter:
mussar ina copia da l’attest da mort (quel survegnis Vus tar l’uffizi da stadi civil),
cumprovar che Vus avais in dretg d’ierta (in extract dal register dal stadi civil, ord il qual resorta Voss grad da parentella u Vossa relaziun civila cun la persuna defuncta, in testament u in contract),
cumprovar che Vus n’avais betg refusà l’ierta (decleranza d’acceptaziun da tut las ertavlas e da tut ils ertavels u cumprova ch’il termin, entaifer il qual ch’i fiss stà pussaivel da refusar l’ierta, è scadì).
Ils custs per emetter in attest d’ierta differenzieschan da cas tar cas. Els dependan dal gener dals scleriments e dal temp che l’autoritad ha stuì impunder per As pudair emetter l’attest d’ierta. Ils custs pon importar intgins tschients u er intgins millis francs. Latiers vegnan ils custs per emetter ils documents da l’uffizi dal stadi civil e per dumandar infurmaziuns en Svizra ed a l’exteriur.