La Cunvegna davart la libra circulaziun facilitescha massivamain l’entrada e la dimora en Svizra per burgaisas e burgais dals stadis da la UE e da la AECL. Per persunas d’auters pajais (terzs stadis) èn las disposiziuns pli restrictivas. Tut tenor il motiv e la durada da Vossa dimora en Svizra duvrais Vus in auter titel da dimora.
Persunas da la UE-27*/AECL** | Persunas da terzs stadis |
|---|---|
|
|
*La UE-27 cumpiglia ils suandants pajais: Austria, Belgia, Bulgaria, Cipra, Croazia, Danemarc, Estonia, Finlanda, Frantscha, Germania, Grezia, Irlanda, Italia, Lettonia, Lituania, Luxemburg, Malta, Pajais Bass, Pologna, Portugal, Rumenia, Slovachia, Slovenia, Spagna, Svezia, Tschechia, Ungaria.
** L'AECL cumpiglia ils suandants pajais: Islanda, Liechtenstein, Norvegia, Svizra.
Sche Vus duvrais ina permissiun da dimora, contactai per plaschair l’autoritad da migraziun e dal martgà da lavur chantunala da Voss domicil.
Las premissas che Vus stuais accumplir per survegnir ina permissiun varieschan tut tenor Vossa naziunalitad, la durada ed il motiv per la dimora. Sin las paginas da ch.ch Lavurar sco persuna estra en Svizra e Dimora en Svizra senza lavur chattais Vus ulteriuras infurmaziuns davart quest tema.
Vus stuais inoltrar Vossa dumonda tar Vossa vischnanca da domicil. En il chantun Genevra èsi auter: là stuais Vus As drizzar al chantun.
- Nagins resultats
A la dumonda stuais Vus agiuntar ils suandants documents:
permissiun actuala
carta d’identitad valaivla u passaport valaivel dal pajais d’origin (sche Vus n’essas betg burgaisa u burgais da la UE/AECL, sto il passaport esser valaivel almain trais mais pli ditg che la permissiun da dimora)
avis da l’autoritad da migraziun chantunala che la permissiun scadia (en cas che Vus avais retschet in tal avis)
Vus pudais inoltrar la dumonda da prolungaziun il pli baud trais mais ed il pli tard duas emnas avant la scadenza da Vossa permissiun.
Sche Vus avais pers Vossa permissiun u sch’ella è vegnida engulada, annunziai quai a la polizia. La polizia As dat in attest da perdita. Qua pudais Vus tschertgar in post da polizia.
Giai alura tar la controlla d’abitantas e d’abitants da Vossa vischnanca (u a l’autoritad chantunala da migraziun). Prendai cun Vus Voss passaport, ina fotografia da passaport e l’attest da perdita. Ils custs per l’emissiun d’in duplicat u per ina nova permissiun stuais Vus surpigliar. Quests custs varieschan.
Sche Vus chattais puspè la permissiun sparida, la stuais Vus laschar annullar tar la controlla d’abitantas e d’abitants da Vossa vischnanca da domicil.
Sche Vus avais survegnì Vossa permissiun da dimora en il rom d’ina reuniun da la famiglia e sche Vus As separais u divorziais da la persuna ch’è la raschun per Vossa permissiun da dimora en Svizra, u sche questa persuna mora, stuais Vus annunziar quai a l’autoritad chantunala da migraziun.
Las persunas cun ina legitimaziun B (permissiun da dimora) pon star en Svizra sut tschertas cundiziuns:
Sche Vus essas burgaisas e burgais da la UE/AECL
Vus pudais dumandar ina permissiun da dimora, en cas che Vus avais ina activitad da gudogn u en cas che Vus disponis dad avunda meds finanzials per garantir Vossa independenza finanziala.
Sche Vus essas burgaisas e burgais da terzs stadis
Vus pudais laschar prolungar Vossa permissiun da dimora sche:
Vus essas stada maridada u stà maridà ed avais vivì ensemen cun Vossa partenaria u cun Voss partenari (svizra/svizzer u estra/ester) durant almain trais onns,
Vus essas integrada u integrà bain en Svizra (Vus respectais l’urden public, avais bunas cumpetenzas linguisticas a bucca, lavurais u essas en furmaziun), u
sch’ina prolungaziun da la dimora en Svizra è necessaria per motivs persunals impurtants (p.ex. reintegraziun sociala fitg difficila en il pajais da derivanza u violenza matrimoniala).
Ulteriuras infurmaziuns davart las permissiuns da dimora pudais Vus retrair tar las autoritads da migraziun e dal martgà da lavur chantunalas.
Il Secretariat da stadi respunda las dumondas frequentas (FAQ) davart las permissiuns da dimora en Svizra.