Las proximas elecziuns dal Cussegl naziunal han lieu ils 22 d'october 2023. En bunamain tut ils chantuns han lieu il medem di er las elecziuns dal Cussegl dals chantuns (emprim scrutini).
Ils chantuns
Ils chantuns han l'incumbensa da manar tras las elecziuns. Els organiseschan il scrutini, tramettan il material electoral e fan differentas controllas. Els controlleschan per exempel, sche las glistas electoralas èn valaivlas. Il di d'elecziun rimnan els ils resultats dals locals electorals, publitgeschan ils resultats e transmettan quels a la Chanzlia federala.
Las vischnancas
Las vischnancas s'occupan per regla dals locals electorals. Ellas nomineschan ils dumbravuschs e portan las urnas en ils locals electorals. Il di d'elecziun procuran las vischnancas che las vuschs vegnian dumbradas correctamain e transmettan ils resultats als chantuns.
La Chanzlia federala
La Chanzlia federala procura che las elecziuns hajan lieu senza incaps. Ella daventa activa en differentas fasas dal process d'elecziun:
Ella reparta ils sezs dal Cussegl naziunal sin ils chantuns.
Ella infurmescha ils chantuns davart las prescripziuns e davart las proceduras che ston vegnir observadas per las elecziuns dal Cussegl naziunal.
Ella controllescha las glistas da candidatas e candidats ch'ella survegn dals chantuns e verifitgescha che nagin na figureschia sin glistas da plirs chantuns.
Ella redigia il mussavia electoral.
Il di d'elecziun As infurmescha ella cuntinuadamain sin ch.ch davart las elecziuns.
Las partidas
En ils chantuns cun dapli che 1 sez en il Cussegl naziunal proponan las partidas e las gruppaziuns las candidatas ed ils candidats. Ellas cumpileschan las glistas electoralas ch'ellas vulan suttametter a las persunas cun dretg da votar. Vegnir elegidas pon mo persunas che figureschan sin ina glista electorala dal chantun.
Auter è quai en ils chantuns cun mo 1 sez en il Cussegl naziunal. Là survegnan las persunas cun dretg da votar ubain in cedel electoral vid ubain in cedel electoral che cuntegna ils nums da tut las candidatas ed ils candidats registrads.
En ils chantuns cun mo 1 sez en il Cussegl naziunal vegni elegì tenor il sistem da maiorz.
En ils chantuns cun plirs sezs en il Cussegl naziunal vegni elegì tenor il sistem da proporz.
ch.ch infurmescha, co che Vus pudais fundar ina partida u daventar commembra u commember d'ina partida.
ch.ch inditgescha, quants sezs che mintga chantun ha en il parlament.