En cas d’ina malsogna betg gravanta
I po esser che Voss uffant vegn malsaun e na po perquai betg ir en la canorta, a scolina u a scola e che Vus na chattais nagin che pudess s’occupar da l’uffant durant che Vus lavurais.
Sche Vus avais in attest dal medi, sto Voss patrun As conceder fin trais dis congedi nunpajà per tgirar Voss uffant malsaun. Vus essas però tuttina obligada u obligà da tschertgar soluziuns alternativas adattadas (p.ex. tgira da l’uffant tras parents u enconuschents). Questa obligaziun na vala betg, sche la preschientscha d’in dals geniturs è indispensabla, per exempel en cas d’ina malsogna gravanta d’in uffant pitschen.
Sche nagins parents u enconuschents na stattan a disposiziun per tgirar Voss uffant malsaun, pudais Vus dumandar agid tar la Crusch Cotschna Svizra. Quella porscha in servetsch da tgira d’uffants a chasa. Ina persuna spezialisada s’occupa da l’uffant, gioga cun el, prepara il gentar ed al dat er medicaments, en cas che quai è necessari.
Questa purschida vala per uffants fin 12 onns. Intginas cassas da malsauns surpiglian ils custs.
En cas d’ina malsogna gravanta
Sche la malsogna da Voss uffant minoren è gravanta, sch’el ha per exempel cancer, pudais Vus vegnir liberada u liberà da la lavur per in temp pli lung. Sut tschertas cundiziuns avais Vus il dretg da tut en tut 14 emnas congedi nunpajà (80 pertschient da la paja) per tgirar Voss uffant malsaun u blessà.
Canortas da las vischnancas
Suenter il congedi da maternitad avais Vus la pussaivladad da laschar tgirar Voss uffants durant il di en ina canorta d’uffants da Vossa vischnanca. Tut tenor la disponibilitad ed il basegn po quai esser in u plirs dis ad emna.
As infurmai a temp tar Vossa vischnanca davart canortas d’uffants e davart las plazzas libras en Vossa regiun.
- Nagins resultats
Canortas privatas u semipublicas
Ultra da las canortas publicas datti instituziuns che vegnan manadas d’organisaziuns sco l’Associaziun per la tgira d’uffants da la Svizra taliana (Associazione Svizzera Strutture d’Accoglienza per l’Infanzia), la Fundaziun Tgira d'uffants en Engiadin'Ota u la pagina d’internet Kinderkrippen-Online.
As infurmai a temp tar Vossa vischnanca davart canortas d’uffants privatas u semipublicas en Vossa regiun.
Canortas d’interpresas
Diversas interpresas mettan a disposiziun atgnas canortas per ils uffants da las collavuraturas e dals collavuraturs. As infurmai tar Voss patrun davart las pussaivladads e davart las cundiziuns per la tgira d’uffants.
Sch’i èn avant maun avunda plazzas libras, porschan questas canortas er plazzas per uffants da geniturs che na lavuran betg en l’interpresa. As infurmai tar Vossa vischnanca da domicil.
- Nagins resultats
En tscherts cas pudais Vus laschar tgirar Voss uffants en ina scolina gia avant la vegliadetgna da scolina. Normalmain è quai pussaivel duas fin trais giadas ad emna per in pèr uras al di. La tgira durant l’entir di n’è dentant betg pussaivla. As infurmai tar Vossa vischnanca davart la purschida en Vossa regiun.
- Nagins resultats
En Svizra pudais Vus er As drizzar ad uschenumnads «geniturs dal di». Savens han quels agens uffants e pon tgirar er Voss uffants durant il di. Blers geniturs dal di èn commembers d’ina associaziun da famiglias dal di che garantescha in servetsch segir e da buna qualitad. As drizzai a la Federaziun svizra per la tgira d'uffants (kibesuisse) per infurmaziuns davart la disponibilitad, davart ils temps da tgira e davart ils custs.
Maisa da mezdi
Scolas, gruppas da geniturs u associaziuns privatas u semipublicas organiseschan mintgatant ina tgira d’uffants sur mezdi. Quella cumpiglia er il gentar.
Tut tenor il chantun u la vischnanca po quella purschida avair differentas furmas.
- Nagins resultats
Scola dal di
Dapi intgins onns datti ultra da las canortas er scolas dal di che tgiran ils uffants la damaun avant l’instrucziun u durant la pausa da mezdi. As infurmai per plaschair tar l’autoritad da scola da Voss chantun u da Vossa vischnanca.
- Nagins resultats
Ils custs per la tgira ordaifer la famiglia varieschan per regla tenor il chantun e tenor las entradas. Contactai las differentas instituziuns per survegnir infurmaziuns en Voss cas specific.
Contactai sco emprim Vossa vischnanca da domicil per As infurmar davart l’entira purschida da sustegn ordaifer la famiglia en Vossa regiun.
Infurmaziuns detagliadas en connex cun Voss dretg da congedi pajà per tgirar Voss uffants malsauns survegnis Vus da Voss patrun ubain sin la pagina correspundenta da l’Uffizi federal d’assicuranzas socialas.