En Svizra han adina pudì fundar in partenadi registrà mo pèrs da la medema schlattaina. Dapi il 1. da fanadur 2022 n'èsi betg pli pussaivel da fundar novs partenadis registrads. Il motiv: dapi lura pon er pèrs da la medema schlattaina maridar.
Sche Vus avais fundà in partenadi registrà avant questa data, al pudais Vus laschar exister vinavant sco fin ussa. Lura na sa mida nagut per Vus.
Sche Vus vulais transfurmar Voss partenadi registrà en ina lètg, pudais Vus far quai en mintga uffizi da stadi civil da la Svizra ubain en ina represchentanza svizra a l'exteriur.
Attenziun: Las differenzas giuridicas tranter in partenadi registrà ed ina lètg concernan cunzunt la natiralisaziun, l'adopziun e la medischina da reproducziun. Da la natiralisaziun facilitada, da l'adopziun cuminaivla e da l'access a la medischina da reproducziun profitan mo conjugals.
Sche Vus avais maridà suenter il 1. da fanadur 2022 a l'exteriur ina persuna da la medema schlattaina, vegn questa lètg renconuschida er en Svizra sco lètg ed inscritta sco tala en il register svizzer dal stadi civil.
Sche Vus avais maridà avant il 1. da fanadur 2022 a l'exteriur ina persuna da la medema schlattaina, n’è questa lètg però betg vegnida reconuschida sco tala en Svizra, mabain sco partenadi registrà. Vus pudais dentant far ina dumonda d’actualisar l’inscripziun en il register svizzer dal stadi civil tar l’autoritad chantunala dal stadi civil da Voss chantun da domicil. Sche Vus vivais a l’exteriur, pudais Vus dumandar ina tala actualisaziun tar la represchentanza svizra a l’exteriur.
Num
Da princip mantegnevan omaduas partenarias u omadus partenaris lur num.
Ma a chaschun da la registraziun dal partenadi pudevan ellas ed els er tscherner lur agen num ubain il num da lur partenaria u da lur partenari sco num cuminaivel.
Dretg da burgais
Auter che tar il matrimoni na permetta il partenadi registrà betg la natiralisaziun facilitada a la partenaria estra u al partenadi ester d’ina persuna cun dretg da burgais svizzer.
Sco partenaria estra u partenari ester giudais Vus dentant facilitaziuns en il rom d’ina natiralisaziun ordinaria, sche Vus vivais cun Vossa partenaria svizra u Voss partenari svizzer dapi 3 onns en in partenadi registrà e sche Vus avais abità durant totalmain 5 onns en Svizra. Infurmaziuns latiers As dat l'autoritad da natiralisaziun da Voss chantun da domicil.
Uffants
Sche Vus vivais en in partenadi registrà, na pudais Vus e Vossa partenaria u Voss partenari ni adoptar cuminaivlamain uffants ni far diever da proceduras medicinalas da reproducziun per daventar geniturs.
Vus pudais dentant adoptar l’uffant da Vossa partenaria u da Voss partenari, sche Vus vivais dapi almain 3 onns en in partenadi registrà ed avais tgirà l’uffant durant almain 1 onn (adopziun dal figliaster).
Sche Vossa partenaria u Voss partenari ha uffants, essas Vus obligada u obligà da sustegnair ella u el areguard la tgira genituriala. En cas da malsogna u d’absenza pudais Vus er remplazzar la mamma u il bab da l’uffant. Sche Vus essas – pervia l’adopziun dal figliaster – tuttas duas u tuts dus geniturs cuminaivels da l’uffant, avais Vus ils medems dretgs da genitur sco in pèr maridà.
Facultad e debits
En general restan las valurs da facultad (ed ils debits) da las duas persunas che vivan en in partenadi registrà separadas (separaziun dals bains).
Vus pudais dentant far in contract da facultad, nua che Vus reglais l’administraziun da la facultad. Il contract sto vegnir documentà d’ina notara u d’in notar.
Taglia
Persunas en in partenadi registrà empleneschan ora ensemen la decleraziun da taglia e pajan cuminaivlamain la taglia.
Mort
Sche Vossa partenaria u Voss partenari mora, avais Vus ils medems dretgs sco la vaiva u il vaiv en in matrimoni:
Vus survegnis ina renta per vaivas u vaivs da la AVS, sche Vus avais uffants minorens.
Vus pudais er retrair ina renta da la cassa da pensiun tenor la LPP, sche Vus stuais pajar per il mantegniment da l’uffant u sche Vus avais sur 45 onns e Voss partenadi registrà ha durà almain 5 onns.
Vus essas l’ertavla legala u l’ertavel legal da la persuna defuncta. Infurmaziuns chattais Vus sin la pagina Ierta.
Infurmaziuns generalas davart il partenadi registrà chattais Vus sin la pagina «Dumondas frequentas» da l’Uffizi federal da giustia.
Per infurmaziuns davart la renconuschientscha d'in partenadi registrà fundà a l'exteriur u davart la transfurmaziun d'in partenadi registrà en ina lètg pudais Vus As drizzar a l'Uffizi dal stadi civil u ad ina represchentanza svizra a l'exteriur.
Infurmaziuns davart la tscherna dal num en in partenadi registrà chattais Vus sin il fegl d’infurmaziun davart il num en in partenadi registrà.
Infurmaziuns davart la taglia survegnis Vus da l'autoritad da taglia da Voss chantun da domicil.
Infurmaziuns davart la schliaziun d’in partenadi registrà chattais Vus sin la pagina d’internet correspundenta.
Per dumondas individualas davart il partenadi registrà e davart il contract da facultad pudais Vus er As drizzar ad in'advocata u ad in advocat ubain ad ina notara u ad in notar.
En la votaziun dal pievel dals 26 da settember 2021 han las Svizras ed ils Svizzers acceptà la lètg er per pèrs da la medema schlattaina. Detagls davart questa votaziun chattais Vus sin la pagina d'internet «Lètg per tuts» da la pagina d'internet uffiziala da la Regenza svizra.