Mo pèrs nunfritgaivels e pèrs che pudessan transmetter grevas malsognas dastgan pretender tractaments cun ina reproducziun cun assistenza medicala. Pèrs pertutgads pon perquai sa drizzar ad in center per reproducziun cun assistenza medicala.
Ils tractaments stattan a disposiziun er a pèrs nunmaridads.
En cas ch’in pèr vul dentant revegnir ad ina donaziun da sems, ston l'um e la dunna esser maridads. Cun la lètg daventa il consort automaticamain bab da l’uffant – er senza derivanza biologica.
Cussegliaziun obligatorica
Pèrs che vulan ademplir lur giavisch d’avair uffants cun agid medicinal, ston vegnir cussegliads avant il tractament da maniera extendida. Sin giavisch vegnan els er accumpagnads psicologicamain. Ils var 30 centers per reproducziun cun assistenza medicala en Svizra porschan ils scleriments medicinals necessaris ed ina tgira cumplessiva.
Suenter che l’infurmaziun e la cussegliaziun han gì lieu, sto il pèr approvar en scrit il tractament medicinal da reproducziun.
Donaziuns da cellas d’ov, donaziuns d’embrios e maternitads substitutivas èn scumandadas en Svizra.
La diagnostica da preimplantaziun, pia l’examinaziun genetica dals embrios schendrads en il vaider da reagenza, vegn permessa mo en dus cas. Tar pèrs nunfritgaivels dastgan las schanzas da svilup dals embrios vegnir intercuridas. Tar pèrs cun malsognas ertaivlas poi vegnir intercurì, sche l'embrio ha la malsogna ertaivla correspundenta.
En cas d’ina donaziun da sems na dastgan ils geniturs betg eleger il donatur. Il center per medischina da reproducziun resguarda dentant ina tscherta sumeglientscha exteriura cun il bab.
Tge ch’è permess en Svizra e tge betg, vegn reglà principalmain en la Lescha davart la medischina da reproducziun
Tge ch’il pèr sto pajar sez e tge che vegn pajà da la cassa da malsauns, dependa da la metoda da tractament.
La decisiun per ina fructificaziun artifiziala en il vaider da reagenza è chara. Ina tala fertilisaziun in vitro na vegn betg pajada da la cassa da malsauns obligatorica.
Ils custs per stimulaziuns ormonalas ed ina inseminaziun (injecziun da sperma en la madra) vegnan surpigliads da las cassas da malsauns fin ad in tschert dumber da tractaments.
Ils custs exacts varieschan tut tenor il cas e n’èn betg tuttina auts en tut ils centers. Durant ils discurs da cussegliaziun vegn il pèr infurmà detagliadamain.
Donaziun da sems e bancas da sperma
Tscherts centers per medischina da reproducziun han er bancas da sperma. Donaturs potenzials han per regla tranter 20 e 40 onns. Lur sanadad vegn intercurida cumplessivamain ed els vegnan infurmads davart ils aspects giuridics. Ils donaturs da sems na vegnan betg pajads e pon sulettamain vegnir indemnisads per spesas. Il sperma dals donaturs dastga vegnir duvrà per schendrar maximalmain otg uffants e dastga vegnir conservà durant maximalmain 5 onns
Datas dals donaturs ed access
La donaziun da sems n’è betg anonima. A la naschientscha d’in uffant ch’è vegnì schendrà cun ina donaziun da sems vegnan las indicaziuns davart il donatur dals sems annunziadas a l’Uffizi federal dal stadi civil. Il register dals donaturs da sperma cuntegna il num, la data da naschientscha, il lieu da burgais u la naziunalitad, il domicil, la professiun u la scolaziun e l'apparientscha.
Uffants schendrads tras ina donaziun da sems pon pretender infurmaziuns davart lur bab biologic. Per regla dentant pir, cur ch’els han 18 onns.
Tras ina donaziun uffiziala da sems na resulta nagina relaziun giuridica da bab-uffant. Perquai na resultan er nagins dretgs correspundents e naginas obligaziuns respectivas (mantegniment, educaziun, ierta).