Vus avais il dretg da supplements da famiglia, sche Vus essas emploiada u emploià u avais in'activitad da gudogn independenta, sche Vus n'avais betg in'activitad da gudogn e sche Vossas entradas suttamessas a la taglia èn bassas. (L’import minimal po variar tenor il chantun).
Sche Vus essas registrada u registrà sco dischoccupada u dischoccupà, n’avais Vus nagin dretg da supplements da famiglia. Vus avais dentant il dretg d’in supplement a las diarias da dischoccupaziun.
Da resguardar: Er sche Vus essas cunfinaria u cunfinari ubain stagiunaria u stagiunari, avais Vus il dretg da supplements da famiglia sut tschertas cundiziuns.
Per mintga uffant survegnis Vus in supplement d’uffants en l’autezza da 200 francs per mais, e quai davent da la naschientscha da l'uffant fin ch'el ha cumplenì 16 onns (u 20 onns, sch'el na po betg lavurar per motivs da sanadad). Per uffants da 15 fin 25 onns en scolaziun survegnis Vus supplements da scolaziun en l’autezza da 250 francs per mais.
Ils chantuns (ed ils patruns) pon pajar supplements pli auts ed er supplements spezials che vegnan pajads a chaschun da la naschientscha u da l’adopziun d'in uffant.
Per mintga uffant avais Vus mo ina giada il dretg da supplements da famiglia. Cun auters pleds: Sche Vus e Vossa partenaria u Voss partenari lavurais omadus, vegnan ils supplements pajads mo ad in genitur.
Supplements da famiglia na vegnan betg pajads automaticamain. Vus stuais far ina dumonda:
Sche Vus essas emploiada u emploià, prenda Voss patrun las mesiras necessarias per che Vus survegnias ils supplements. Sch’el na fa betg quai, stuais Vus far ina dumonda per supplements da famiglia tar Voss patrun. Il patrun trametta vinavant Vossa dumonda a la cassa da cumpensaziun per famiglias. Sche la cassa accepta la dumonda, paja Voss patrun ils supplements mintga mais ensemen cun la paja.
Sche Vus avais in'activitad da gudogn independenta, stuais Vus far persunalmain ina dumonda per supplements da famiglia tar la cassa da cumpensaziun per famiglias.
Sche Vus n'avais betg in'activitad da gudogn, stuais Vus far Vossa dumonda a la cassa chantunala da cumpensaziun per famiglias che vegn manada da las cassas da cumpensaziun da la AVS.
Resguardai per plaschair:
Sche Vus avais emblidà da far ina dumonda per supplements da famiglia u sche Vus n’avais betg savì che Vus avais il dretg sin supplements, pudais Vus far ina dumonda da supplements cun effect retroactiv entaifer maximalmain tschintg onns.
Ulteriuras infurmaziuns davart ils supplements da famiglia chattais Vus sin las paginas Dumondas e respostas davart supplements da famiglia e Geners e tariffas dals supplements da famiglia da l'Uffizi federal d’assicuranzas socialas (UFAS) sco er sin la pagina Supplements da famiglia dal Post d’infurmaziun da la AVS/AI.
Sche Vus avais uffants che vivan a l’exteriur, chattais Vus infurmaziuns sin la pagina Uffants cun domicil a l’exteriur dal UFAS.
Infurmaziuns generalas davart l’andament a chaschun da la naschientscha u da l’adopziun d'in uffant chattais Vus sin las paginas Naschientscha ed Adopziun.