Sch'ina persuna mora en ina instituziun, sco per exempel en in ospital u en ina chasa da dimora, lascha questa instituziun emetter automaticamain in'attestaziun medicala da la mort.
Sch'ina persuna mora d'ina mort natirala ordaifer ina tala instituziun, per exempel a chasa, stuais Vus clamar la media u il medi da chasa ubain la media u il servetsch d'urgenza. Ella u el vegn a constatar la mort ed ad emetter l'attestaziun medicala da la mort.
Sch'in accident u in delict è il motiv da la mort, stuais Vus infurmar la polizia per sclerir l'andament exact.
Sch'ina persuna mora en in ospital u en ina chasa da dimora, annunzia questa instituziun directamain il mortori.
Sch'ina persuna na mora betg en ina tala instituziun, ston las confamigliaras ed ils confamigliars annunziar il mortori entaifer 2 dis a l'autoritad cumpetenta. Per regla è quai l'uffizi da stadi civil dal lieu da la mort.
Las confamigliaras ed ils confamigliars pon autorisar ina terza persuna, p.ex. in institut da sepultura privat u in uffizi da sepultura public, d'annunziar il mortori e da liquidar tut las formalitads. As infurmai davart las pussaivladads sin la pagina d'internet da Voss chantun u da Vossa vischnanca.
Tgi che fa l'annunzia sto per regla preschentar ils suandants documents per quest intent:
attestaziun medicala da la mort
cudeschet da famiglia u certificat da famiglia resp. attest da partenadi da la persuna defuncta
passaport u carta d'identitad da la persuna defuncta
en cas da persunas estras: certificat da domicil u permissiun da dimora da la persuna defuncta
Per la sepultura vegn l'uffizi da stadi civil ad emetter la conferma da l'annunzia dal mortori sco er – suenter la documentaziun dal mortori – il document da mort.
Resguardai per plaschair: A l'uffizi da stadi civil dal lieu da la mort stuais Vus annunziar er la mort da persunas estras che n'abitan betg en Svizra. En cas da persunas estras stuais Vus inoltrar er il passaport u la carta d'identitad da la conjugala u dal conjugal ubain da la partenaria u dal partenari. L'uffizi da stadi civil po pretender ulteriurs documents.
Cura e co?
La sepultura dastga avair lieu pir suenter che l'uffizi da stadi civil ha emess la conferma da l'annunzia dal mortori.
En Svizra datti differents usits e diversas praticas areguard la sepultura. As infurmai tar la vischnanca, tar l'uffizi da sepultura ubain tar ina sepulidra u in sepulider privat e discutai ils aspects pratics da la sepultura, sco il lieu e la data u er il decurs.
Furma da la sepultura
En Svizra pudais Vus eleger tranter cremaziun ed enterrament. Infurmaziuns davart la cremaziun e davart las pussaivladads da sepultura (nischa sepulcrala, halla d'urnas u enterrament en fossas singulas, en fossas da famiglia u en fossas da cuminanza) survegnis Vus tar l'uffizi da sepultura respectivamain tar la vischnanca da domicil da la persuna defuncta.
Custs
Bleras vischnancas porschan in enterrament u ina cremaziun gratuita per lur persunas defunctas. Sche quai n'è betg il cas, pudais Vus incumbensar in institut da sepultura cun l'organisaziun da la sepultura. Dumandai ina calculaziun dals custs.
Sch'ina persuna mora a l'exteriur, infurmescha l'autoritad a l'exteriur u la parentella da la persuna defuncta per il solit la represchentanza svizra al lieu (consulat u ambassada).
Vus stuais surdar sezza u sez il document ester da mort a la represchentanza svizra al lieu. Quella transmetta il document da mort a l'uffizi da stadi civil dal lieu d'origin da la persuna defuncta.
Sche Vus giavischais da sepulir la persuna defuncta en Svizra, As sustegna la represchentanza svizra tar tschertas formalitads per il repatriament. En emprima lingia è la parentella responsabla per il repatriament.
Suenter la sepultura datti d'organisar differentas chaussas. En spezial stuais Vus:
disdir las assicuranzas (cassa da malsauns, da mobigliar, da responsabladad, d'accident e.u.v.)
disdir la AVS ed in'eventuala assicuranza da vita e dumandar la renta per survivents che Vus pudais forsa pretender
s'infurmar tar il patrun, sche Vus pudais pretender ina renta per survivents da la segunda pitga (provediment professiunal), ina indemnisaziun da partenza ed in pajament restant dal salari da la persuna defuncta e.u.v.
infurmar la banca e la Posta
disdir abunaments da gasettas e dal traffic public, commembranzas en societads ed uniuns e.u.v.
infurmar l'autoritad fiscala
infurmar l'uffizi per il traffic sin via, sche la persuna defuncta aveva in permiss da manischar ed in vehichel sin ses num
infurmar il locatur, en cas che la persuna defuncta ha vivì en in'abitaziun affittada. Sche la persuna defuncta ha vivì suletta, stuais Vus disdir l'abitaziun e guardar che l'abitaziun u la chasa vegnia rumida entaifer il termin previs en il contract da locaziun
Infurmaziuns davart la partiziun d'ierta chattais Vus sin la pagina Ierta.