Tar contracts da lavur illimitads dura il temp da prova in mais. La patruna u il patrun As po dentant proponer in temp da prova da fin trais mais. En quest cas dovri ina cunvegna en scrit tranter Vus e Voss patrun u Vossa patruna.
Tar contracts da lavur limitads n’è previs nagin temp da prova. La lavuranta u il lavurant e la patruna u il patrun pon però sa cunvegnir ad in tal.
Tar in emprendissadi po il contract d’emprendissadi prevair in temp da prova dad in fin trais mais. En tscherts cas po il temp da prova perfin durar fin sis mais. Per quai sto la patruna u il patrun dentant dumandar la permissiun da l’autoritad chantunala responsabla per la furmaziun professiunala.
En tut ils cas vala ch’il temp da prova sto esser medem lung per la patruna u il patrun e per la lavuranta u il lavurant.
A la fin dal temp da prova datti per regla in discurs tranter la patruna u il patrun e la lavuranta u il lavurant. En quel giuditgeschan tuts dus il temp da prova e decidan, sche la relaziun da lavur duai cuntinuar u betg.
Sche Vus vegnis malsauna u malsaun durant il temp da prova u sche Vus avais in accident e na pudais betg lavurar durant in tschert temp, po la patruna u il patrun da lavur prolungar correspundentamain il temp da prova.
La patruna u il patrun ha en quest cas er il dretg da disdir il contract da lavur: Durant il temp da prova n’avais Vus nagina protecziun cunter la disditga en cas d’ina malsogna u d’in accident, sco che quai è il cas pli tard tar in engaschament definitiv.
Er sche Vus vegnis en speranza durant il temp da prova, po la patruna u il patrun disdir il contract da lavur. Vus n’essas dentant per regla mai obligada d’infurmar Vossa patruna u Voss patrun davart la gravidanza. Vus decidais sezza, cura che Vus vulais infurmar ella u el.
La dumonda areguard las vacanzas durant il temp da prova n’è betg reglada cleramain. Vus stuais As cunvegnir cun Vossa patruna u Voss patrun, sche Vus vulais retrair vacanzas durant il temp da prova.
Sche Vus savais gia tar il discurs d’engaschament che Vus planisais d’esser absenta u absent durant in temp pli lung per vacanzas, èsi raschunaivel d’infurmar la patruna u il patrun. Uschia pon ins sa cunvegnir uschè spert sco pussaivel.
Durant il temp da prova vala tant per Vus sco er per la patruna u il patrun in termin da disditga da 7 dis da chalender. En il contract da lavur po dentant er vegnir fixà in temp pli curt u pli lung.
Vus pudais disdir il contract da lavur da tut temp, premess che la patruna u il patrun respectivamain la lavuranta u il lavurant survegnia la disditga il pli tard l’ultim di dal temp da prova.
Vus pudais disdir a bucca u en scrit, nun che Voss contract da lavur inditgescha la furma exacta da la disditga.
Vus na stuais betg motivar la disditga. L’autra partida po dentant pretender che Vus inditgais in motiv per la disditga.
Per infurmaziuns generalas davart il dretg da lavur pudais Vus consultar la pagina Dretg da lavur e la pagina dal Secretariat da stadi per l’economia (SECO).
Per ulteriuras infurmaziuns pudais Vus consultar la pagina Disditga ed ultra da quai la pagina davart las dumondas frequentas (FAQ) dal SECO.