En Svizra ston tut las persunas esser assicuradas cunter accidents, dentant datti constellaziuns differentas:

• Sche Vus essas emploiada u emploià, è Voss patrun obligà d’As assicurar tar in’assicuranza d’accidents. La premia d’assicuranza vegn deducida da Vossa paja. Quai vala er per persunas che lavuran a chasa sco er per emprendistas ed emprendists.

• Sche Vus essas assicurada u assicurà cumplainamain cunter accidents sur Voss patrun, As recumandain nus d’annullar la garanzia dals custs d’accident cuntegnida en Vossa cassa da malsauns (assicuranza da basa), per uschia spargnar premias. Sche Vus essas annunziada u annunzià sco dischoccupada u dischoccupà, essas Vus assicurada u assicurà automaticamain tar l’Institut svizzer d’assicuranza d’accidents (Suva). La premia d’assicuranza vegn deducida dals daners da dischoccupaziun.

• Sche Vus lavurais independentamain, pudais Vus far sezza u sez in’assicuranza d’accidents.

• En tut ils auters cas n’essas Vus betg assicurada u assicurà tar l’assicuranza d’accidents. La ristga d’accidents vegn dentant pajada da l’assicuranza da malsauns obligatorica (assicuranza da basa). Quai vala per exempel per chasarinas, uffants, studentas e students e per persunas pensiunadas. Examinai Vossa polissa da la cassa da malsauns.

I n’è betg adina simpel da differenziar tranter accident e malsogna. L’assicuranza d’accidents vegn applitgada mo per ils accidents u per las malsognas professiunalas ch'èn definids correspundentamain en la lescha. La Suva mussa ils criteris fixads en la lescha sco er exempels concrets da la garanzia probabla en il cas singul.

Sche Voss pensum da lavur tar Voss patrun importa otg uras u dapli per emna, paja l’assicuranza d’accidents per accidents da lavur, per malsognas professiunalas sco er per accidents ordaifer la professiun che capitan durant in'activitad da temp liber.

Sche Voss pensum da lavur tar Voss patrun importa pli pauc che otg uras per emna, paja l’assicuranza d’accidents mo per accidents da lavur e per malsognas professiunalas. Sch'in accident capita durant il viadi a la lavur, vala el sco accident da lavur.

Sche Vus avais gì in accident, stuais Vus infurmar Voss patrun uschè svelt sco pussaivel. El sto annunziar il cas immediatamain a l’assicuranza.

Sche Vus essas annunziada u annunzià sco dischoccupada u dischoccupà, stuais Vus infurmar l’intermediaziun regiunala da lavur u la Suva.

Sche Vus essas assicurada u assicurà cunter accidents tar la cassa da malsauns, stuais Vus infurmar quella.

Suenter stuais Vus emplenir il formular per annunziar l’accident e trametter tal a l’assicuranza responsabla.

Custs medicinals

L’assicuranza d’accidents paja ils custs medicinals en connex cun l’accident. Vus na stuais pajar ni ina franschisa ni ina quota persunala. Ma attenziun: Sche Vus essas assicurada u assicurà cunter accidents tar Vossa assicuranza da malsauns, stuais Vus surpigliar sezza u sez la franschisa e la quota persunala.

Diaria / pajament cuntinuà da la paja

Sche Vus essas invalida u invalid pervia da l’accident, pudais Vus pretender a partir dal terz di suenter l’accident ina diaria dad 80 pertschient da Vossa paja.

Sche l’indemnisaziun da l’assicuranza d’accidents è pli bassa, sto il patrun pajar la differenza. Sche las contribuziuns da l’assicuranza importan almain 80 pertschient da Vossa paja, n'è Voss patrun betg obligà da pajar vinavant la paja.

Sche l’assicuranza d’accidents na surpiglia betg il cas, survegn la lavuranta u il lavurant per regla l’entira paja durant in tschert temp. La durada dependa da la dumonda, quant ditg ch’insatgi ha lavurà per sia firma. As infurmai en il reglament da lavur, sche Vus vulais savair, tge che vala en Voss cas.

Resguardai per plaschair: Sche Vus lavurais, malgrà che Vus essas invalida u invalid, po l’assicuranza pretender che Vus pajas enavos la diaria retschavida.

Autras contribuziuns da l’assicuranza d’accidents

L’assicuranza d’accidents prevesa differentas contribuziuns finanzialas.

L’assicuranza po pajar ina renta per survivents, sch’il tractament medicinal n’empermetta nagina meglieraziun essenziala dal stadi da sanadad futur. Quai vala dentant mo, sch’il grad d’invaliditad importa almain 10 pertschient. Questa renta po vegnir concedida supplementarmain a la renta da l’assicuranza d’invaliditad per survivents.

L’assicuranza po pajar ina indemnisaziun d’integritad e/u ina indemnisaziun a persunas dependentas d’agid, sch’ellas dovran in sustegn duraivel per pudair dumagnar incumbensas da mintgadi.

Sche la persuna assicurada mora en consequenza d’in accident, pon la dunna u l’um, la partenaria registrada u il partenari registrà ed ils uffants pretender ina renta per survivents.