Tut las persunas che vivan u lavuran en Svizra ston pajar contribuziuns a la AVS a partir dal 1. da schaner che suonda l'onn ch’ellas han cumplenì 20 onns, fin la vegliadetgna da pensiun (u pli precis vegliadetgna da referenza). L'obligaziun cumenza cun 17 onns, sche Vus lavurais gia. Ed ella vala anc suenter la vegliadetgna da pensiun, sche Vus cuntinuais cun in'activitad da gudogn.
La renta da vegliadetgna che Vus survegnis suenter il pensiunament dependa da la summa totala da las contribuziuns che Vus avais pajà a la AVS durant Vossa vita.
Vus n’avais betg in’activitad da gudogn
Sche Vus n’avais betg in’activitad da gudogn, stuais Vus pajar ina contribuziun a la AVS d'almain 530 francs per onn (tut tenor Vossa situaziun). Quai è per exempel il cas, sche Vus studegiais u sche Vus essas pensiunada u pensiunà avant la vegliadetgna ordinaria, sche Vus survegnis ina renta da l’assicuranza d’invaliditad, diarias per persunas malsaunas u diarias per accidents ubain sche Vus essas senza lavur ed avais gia pers il dretg da schurnada. Questa summa cumpiglia er las contribuziuns obligatoricas per l’assicuranza d’invaliditad e l’indemnisaziun da la perdita da gudogn.
Resguardai per plaschair: Persunas maridadas senza activitad da gudogn na ston pajar nagut, sche lur consorta u lur consort ha in'activitad da gudogn e paja almain il dubel da la contribuziun minimala annuala (pia 530 francs x 2 = 1060 francs). Il medem vala per la partenaria registrada u il partenari registrà.
Sin la pagina d’internet da l’Uffizi federal d’assicuranzas socialas pudais Vus calcular online las contribuziuns che Vus stuais pajar en Voss cas.
Vus essas emploiada u emploià
Las contribuziuns a la AVS (8,7 pertschient da la paja) vegnan pajadas per la mesadad da Vus e per la mesadad da Voss patrun. Quel s’occupa da tut: El deducescha las contribuziuns a la AVS directamain da Voss rendaquint da la paja e las transferescha a la cassa da cumpensaziun.
Resguardai per plaschair: Ultra da las contribuziuns a la AVS stuais Vus e Voss patrun er pajar las contribuziuns obligatoricas per l’assicuranza d’invaliditad, per l’indemnisaziun da la perdita da gudogn e per l'assicuranza cunter la dischoccupaziun.
Sin la pagina d’internet da l’Uffizi federal d’assicuranzas socialas pudais Vus calcular online las contribuziuns che Vus stuais pajar en Voss cas.
Vus avais in’activitad da gudogn independenta
Sche Vus avais in’activitad da gudogn independenta, stuais Vus pajar sezza u sez las contribuziuns a la AVS (normalmain 8,1 pertschient da Vossas entradas). As drizzai ad ina cassa da cumpensaziun per savair, co che Vus stuais proceder.
Resguardai per plaschair: Ultra da las contribuziuns a la AVS stuais Vus er pajar las contribuziuns obligatoricas per l’assicuranza d’invaliditad e per l’indemnisaziun da la perdita da gudogn.
Sin la pagina d’internet da l’Uffizi federal d’assicuranzas socialas pudais Vus calcular online las contribuziuns che Vus stuais pajar en Voss cas.
Vus cuntinuais a lavurar suenter la vegliadetgna da pensiun
Sche Vus cuntinuais a lavurar suenter la vegliadetgna da pensiun, stuais Vus pajar er vinavant las contribuziuns a la AVS/AI/UCG.
Contribuziuns a l’assicuranza cunter la dischoccupaziun na stuais Vus percunter betg pli pajar: A partir da la vegliadetgna da pensiun ordinaria n’avais Vus numnadamain nagin dretg pli sin l’assicuranza cunter la dischoccupaziun.
Las contribuziuns che Vus pajais durant quest temp vegnan incassadas da la part da Vossa paja che surpassa ina tscherta summa libra (actualmain 16 800 francs per onn). Vus pudais dentant desister da la summa libra per laschar calcular las contribuziuns en relaziun cun l’entira paja.
Sche Vus lavurais per plirs patruns, vala la summa libra per mintga singula relaziun da lavur.
Sin la pagina d’internet da l’Uffizi federal d’assicuranzas socialas pudais Vus calcular online las contribuziuns che Vus stuais pajar en Voss cas.
Sche Vus na lavurais per gudogn betg durant l’entir onn, vegn la summa libra calculada procentualmain.
Vus giais a l’exteriur
Sche Vus giais a l’exteriur, na pajais Vus per ordinari naginas contribuziuns a la AVS pli en Svizra.
En tscherts cas (per exempel sche Vus essas davent mo per in temp limità u sche Vus lavurais per in patrun svizzer) e cun observar tschertas cundiziuns pudais Vus cuntinuar a pajar las contribuziuns a la AVS obligatoricas en Svizra u almain As participar a la AVS facultativa (per exempel sche Vus giais en in pajais che na fa betg part dals stadis da la UE/AECL).
Per vegnir a savair en detagl tge pussaivladads ch’i dat en Voss cas, pudais Vus As drizzar directamain a Vossa cassa da cumpensaziun da la AVS u a la represchentanza svizra a l’exteriur da Voss pajais da domicil futur.
Vus pudais empustar da tut temp in extract dal conto da Vossas contribuziuns a la AVS. Sche Vus constatais sbagls u inexactadads, pudais Vus pretender che Vossa cassa da cumpensaziun curregia l’extract entaifer 30 dis suenter che Vus l’avais retschavì.
Igl è obligatoric da pajar las contribuziuns a la AVS. Tuttina èsi per differents motivs pussaivel che Vus n’avais betg adina pajà las contribuziuns e che Vus avais perquai mancanzas da contribuziuns.
Per exempel: Vus n'avais pajà naginas contribuziuns durant Voss studi.
Sche Vus n’avais betg adina pajà las contribuziuns, è Vossa renta da la AVS pli bassa. Sch’i manca per exempel in onn da contribuziun, vegn Vossa renta ad esser per var 2,3 pertschient pli bassa.
Las contribuziuns mancantas pudais Vus da princip pajar pli tard. Quai è dentant pussaivel mo per mancanzas dals ultims tschintg onns. Mancanzas da contribuziun ch’èn resultadas pli baud, na pon ins betg cumpensar cun pajaments supplementars.
Sche Vus cuntinuais percunter a lavurar suenter avair cuntanschì la vegliadetgna da referenza, pudais Vus sut tschertas cundiziuns cumpensar mancanzas cun las contribuziuns pajadas ed eventualmain meglierar Vossa renta.
As drizzai a Vossa cassa da cumpensaziun per vegnir a savair, co che Vus stuais proceder.
La pagina Provediment da vegliadetgna explitga il princip da las trais pitgas che furman il sistem da provediment en Svizra.
Tut las infurmaziuns impurtantas davart las contribuziuns a la AVS ch’èn relevantas per Voss cas survegnis Vus da Vossa cassa da cumpensaziun.
Sin la pagina da l’Uffizi federal d’assicuranzas socialas chattais Vus ina glista cun las dumondas frequentas davart las contribuziuns a la AVS.
Fegls d’infurmaziun davart las contribuziuns a la AVS chattais Vus sin la pagina d’internet dal Post d’infurmaziun da la AVS/AI.
Infurmaziuns specificas davart las contribuziuns da la AVS/AI per persunas che bandunan la Svizra chattais Vus sin la pagina Dumondas e respostas davart la AVS da l’Uffizi federal d’assicuranzas socialas, sin il fegl d'infurmaziun «Lavurantas e lavurants a l’exteriur e lur confamigliars» e sin la pagina d’internet dal Post d’infurmaziun da la AVS/AI.
Infurmaziuns davart quest tema chattais Vus er sin la pagina Pensiun a l’exteriur.
Infurmaziuns davart las mancanzas da contribuziuns a la AVS chattais Vus sin la pagina d’internet dal Post d’infurmaziun da la AVS/AI.