Lavur da notg temporara e permanenta
Tenor la lescha èsi scumandà en Svizra d'engaschar lavurantas e lavurants tranter las 23.00 e las 06.00. Sch'in patrun vul tuttina engaschar lavurantas e lavurants durant questa perioda, dovra el ina permissiun sco er il consentiment da la lavuranta u dal lavurant.
En cas da lavur da notg na dastga ina lavuranta u in lavurant betg lavurar dapli che nov uras entaifer in spazi da temp da diesch uras, e quai inclusiv las pausas.
Resguardai per plaschair: En Svizra vegni differenzià tranter lavur da notg temporara e lavur da notg permanenta.
Ins discurra da lavur da notg temporara, sch'i sa tracta d'engaschaments determinads d'ina durada da maximalmain 6 mais per engaschament.
Da lavur da notg permanenta discurran ins, sch'ella surpassa il temp numnà qua survart. Resguardai per plaschair che la lavur da notg, che sa cumpona per la medema raschun d’engaschaments regulars che sa repetan durant plirs onns, vala er sco lavur da notg permanenta.
Dumandar ina permissiun
Sche Vus sco patrun vulais introducir lavur da notg temporara, stuais Vus inoltrar a l’autoritad chantunala cumpetenta ina dumonda motivada per ina permissiun da temp da lavur.
Sche Vus vulais introducir lavur da notg per in temp pli lung, stuais Vus dumandar ina permissiun per lavur da notg permanenta. Inoltrai Vossa dumonda sur EasyGov.swiss – Il spurtegl online per interpresas.
Resguardai per plaschair: Sch'ina lavuranta u in lavurant lavura durant 25 notgs u dapli per onn, ha ella u el il dretg da laschar examinar medicinalmain la qualificaziun per la lavur da notg. En tscherts cas è ina tala consultaziun medicinala obligatorica, per exempel per glieud giuvna che vegn engaschada da notg u per lavurantas e lavurants che lavuran sut cundiziuns difficilas (temperaturas extremas, canera, vibraziuns, lavur corporala, lavur singula e.u.v.). A partir da 45 onns pon las lavurantas ed ils lavurants pretender che la consultaziun haja lieu mintg’onn.
Lavur da notg temporara
Lavurantas e lavurants che lavuran durant main 25 notgs per onn chalendar tranter las 23.00 e las 06.00 pon pretender in supplement da paja d'almain 25 pertschient.
Lavur da notg permanenta
Lavurantas e lavurants che lavuran durant 25 notgs u dapli per onn chalendar pon pretender ina cumpensaziun da 10 pertschient da las uras da lavur prestadas durant la notg.
Igl è scumandà da remplazzar quest supplement da temp tras in supplement da paja. La cumpensaziun tras temp da paus duai numnadamain permetter a la lavuranta u al lavurant da sa revegnir e da prender suenter la mancanza da sien.
Sin la pagina dal SECO chattais Vus in fegl d’infurmaziun ch'explitgescha detagliadamain l’indemnisaziun en cas da lavur da notg permanenta.
Lavur da dumengia temporara e permanenta
En general è la lavur da dumengia scumandada en Svizra. Sch'in patrun vul tuttina engaschar lavurantas e lavurants la dumengia, dovra el ina permissiun sco er il consentiment da la lavuranta u dal lavurant.
Resguardai per plaschair: En Svizra vegni differenzià tranter lavur da dumengia temporara e lavur da dumengia permanenta.
Ins discurra da lavur da dumengia temporara, sch’i sa tracta d'engaschaments determinads d'ina durada da maximalmain 6 mais. La lavur durant in firà uffizial vala er sco lavur da dumengia.
Da lavur da dumengia permanenta discurran ins, sch’ella surpassa questa limita. Resguardai per plaschair che la lavur da dumengia, che sa cumpona per la medema raschun d’engaschaments regulars che sa repetan durant plirs onns, vala er sco lavur da dumengia permanenta.
Dumandar ina permissiun
Sche Vus sco patrun vulais engaschar temporarmain lavurantas e lavurants la dumengia, stuais Vus inoltrar a l'autoritad chantunala cumpetenta ina dumonda per ina permissiun da temp da lavur. Questa autoritad As dat las infurmaziuns necessarias ed ils formulars necessaris per inoltrar la dumonda.
Sche Vus vulais dumandar ina permissiun per lavur da dumengia permanenta, inoltrai Vossa dumonda sur EasyGov.swiss – Il spurtegl online per interpresas.
Lavur da dumengia temporara
Lavurantas e lavurants che lavuran fin sis dumengias ad onn pon pretender in supplement da paja da 50 pertschient ed ina cumpensaziun da temp. Questa cumpensaziun variescha tut tenor la situaziun sco suonda:
Lavur da dumengia d'ina durada da fin tschintg uras sto vegnir cumpensada entaifer quatter emnas tras temp liber da la medema durada.
Sche la lavur da dumengia dura pli ditg che tschintg uras, sto vegnir concedì per l’emna precedenta u suandanta in di da paus d'almain 24 uras successivas (supplementarmain al temp da paus quotidian, vul dir supplementarmain al temp da paus tranter dus dis da lavur, che sto importar almain 11 uras; en tut sto la cumpensaziun pia importar 35 uras).
Lavur da dumengia permanenta
Lavurantas e lavurants che lavuran permanentamain la dumengia pon pretender ina cumpensaziun da temp. Questa cumpensaziun variescha tut la tenor situaziun sco suonda:
Lavur da dumengia d'ina durada da fin tschintg uras sto vegnir cumpensada entaifer quatter emnas tras temp liber da la medema durada.
Sche la lavur da dumengia dura pli ditg che tschintg uras, sto vegnir concedì per l’emna precedenta u per l'emna suandanta in di da paus d'almain 24 uras successivas (supplementarmain al temp da paus quotidian, vul dir supplementarmain al temp da paus tranter dus dis da lavur, che sto importar almain 11 uras; en tut sto la cumpensaziun pia importar 35 uras).
Igl è scumandà da remplazzar questa cumpensaziun da temp tras in supplement da paja. La cumpensaziun tras temp da paus duai numnadamain permetter a la lavuranta u al lavurant da sa revegnir e da prender suenter la recreaziun persa durant la dumengia u durant il firà.
En tschertas professiuns ed en tschertas categorias da professiun pon lavurantas e lavurants vegnir engaschads senza permissiun la notg e la dumengia. Uschia per exempel en il sectur da la sanadad, en la restauraziun, dentant er en kioscs, en pasternarias, en teaters ed en redacziuns da gasettas.
Sin la pagina d’internet dal SECO chattais Vus ina glista actuala da las categorias da professiun, nua che la lavur da notg e da dumengia è pussaivla senza permissiun.
Sin la pagina d’internet dal SECO chattais Vus respostas a las dumondas las pli frequentas davart la lavur da notg e da dumengia.
Per ulteriuras infurmaziuns che pertutgan la lavur da notg e da dumengia, las permissiuns, las indemnisaziuns, las limitas da vegliadetgna, las excepziuns e.u.v. pudais Vus As drizzar a l'autoritad responsabla da Voss chantun.
Per reducir las formalitads administrativas: Inoltrai Vossa dumonda da temp da lavur sur EasyGov.swiss – Il spurtegl online per interpresas.