Retratga da la renta da la AVS (1. pitga)
Per survegnir la renta da la AVS stuais Vus annunziar Vossa pretensiun en scrit a la cassa da cumpensaziun, nua che Vus avais pajà las contribuziuns a la AVS durant ils ultims onns. Sche Vus essas emploiada u emploià e n’enconuschais betg Vossa cassa da cumpensaziun, dumandai Vossa patruna u Voss patrun.
Vossa annunzia stuais Vus trametter almain trais mais avant che Vus cuntanschais la vegliadetgna da renta ordinaria, per che la cassa da cumpensaziun possia rimnar tut las infurmaziuns ch’ella dovra per calcular Vossa renta.
Retratga da la renta da la LPP (2. pitga)
Contactai Vossa cassa da pensiun intgins mais avant che Vus cuntanschais Vossa vegliadetgna da renta ordinaria (65 onns per ils umens, 64 onns per las dunnas), per che quella As possia infurmar davart l’autezza exacta da la renta da Vossa 2. pitga e davart ils pass che Vus stuais far per retrair la renta.
Retratga da las contribuziuns da la 3. pitga
Contactai l’instituziun da Voss provediment privat avant che Vus cuntanschais la vegliadetgna da renta ordinaria, per che quella As possia infurmar detagliadamain davart las modalitads per retrair las contribuziuns da Vossa 3. pitga e davart l’autezza dal chapital spargnà.
Retratga anticipada da la renta da la AVS (1. pitga)
La Refurma AVS 21 è en vigur dapi il 1. da schaner 2024. Ella As pussibilitescha da retrair l’entira renta da la AVS gia dus onns avant la vegliadetgna da 65 onns.
Sche Vus essas ina dunna ch’è naschida tranter il 1961 ed il 1969, alura valan reglas transitoricas spezialas.
Vus pudais er As decider da retrair anticipadamain mo ina part da la renta (tranter 20 % ed 80 %). Vossa renta vegn scursanida en proporziun cun il dumber da mais che Vus avais retratg anticipadamain la renta.
As drizzai a Vossa cassa da cumpensaziun per vegnir a savair tut las pussaivladads ed ils detagls valaivels en connex cun retrair anticipadamain la renta.
Attenziun: La retratga anticipada da la renta stuais Vus dumandar il pli tard la fin da quel mais che preceda il mais, a partir dal qual Vus vulais retrair la renta.
Retratga anticipada da la renta da la LPP (2. pitga)
Il chapital da la 2. pitga na pudais Vus en general betg retrair anticipadamain. Tschertas instituziuns da provediment permettan dentant in pensiunament anticipà a partir da 58 onns.
Contactai Vossa cassa da pensiun almain in onn avant Voss 58. anniversari per sclerir, sch’in pensiunament anticipà è pussaivel e sut tge cundiziuns.
Retratga anticipada da las contribuziuns da la 3. pitga
Il chapital da Vossa 3. pitga pudais Vus en general retrair il pli baud 5 onns avant la vegliadetgna ordinaria da renta (q.v.d. cun 60 onns).
L’instituziun da Voss provediment privat As po infurmar detagliadamain davart las modalitads per retrair Vossa 3. pitga e davart l’autezza dal chapital spargnà. Contactai l'instituziun intgins mais avant il pensiunament anticipà per instradar la retratga da Voss dabun.
Retratga da la renta AVS (1. pitga)
Sche Vus avais cuntanschì la vegliadetgna da renta, pudais Vus lavurar vinavant ed uschia spustar il cumenzament dal pajament da Vossa renta. Vus pudais er chalar da lavurar, ma spustar il cumenzament dal pajament da Vossa renta.
Igl è pussaivel da spustar il pajament da la renta per almain 1 onn, ma betg per dapli che 5 onns.
Vus pudais tscherner da spustar cumplettamain u parzialmain (tranter 20 % ed 80 %) Vossa renta. Vus pudais p.ex. lavurar vinavant e reducir Voss pensum da lavur ed uschia cumpensar la perdita d’entradas cun ina part da Vossa renta da la AVS.
As infurmai tar Vossa cassa da cumpensaziun da la AVS davart il proceder ed ils reglaments che valan per Voss cas.
Retratga da la renta da la LPP (2. pitga), sche Vus lavurais suenter la vegliadetgna da pensiunament
La renta da la 2. pitga vegn normalmain pajada ora a partir da la vegliadetgna da renta ordinaria. Il reglament da Vossa instituziun da provediment po dentant er pussibilitar da spustar il pajament fin al 70. anniversari.
Per eruir, sch’ina suspensiun da Vossa renta è in'opziun per Vus e sut tge cundiziuns ch’ina tala fa senn, As drizzai ad uras a Vossa instituziun da provediment.
Retratga da las contribuziuns da la 3. pitga, sche Vus lavurais suenter la vegliadetgna da pensiunament
Vossa 3. pitga pudais Vus da princip retrair il pli tard la fin dal mais, a partir dal qual Vus survegnis la renta da la AVS.
Sche Vus lavurais dentant suenter la vegliadetgna da pensiunament e pudais cumprovar quai, pudais Vus spustar la retratga da la 3. pitga fin maximalmain tschintg onns suenter che Vus avais cuntanschì la vegliadetgna da renta ordinaria.
L’instituziun da Voss provediment privat As po infurmar detagliadamain davart las modalitads per retrair Vossa 3. pitga e davart l’autezza dal chapital spargnà.
Pensai da far in’assicuranza d’accidents, uschespert che Vus n’avais nagina patruna u nagin patrun pli, pertge che fin ussa eras Vus assicurada u assicurà correspundentamain tar Vossa patruna u Voss patrun.
Sin la pagina d'internet da l’Uffizi federal d’assicuranzas socialas chattais Vus differentas broschuras che tractan detagliadamain il provediment da vegliadetgna. Ellas pon vegnir empustadas gratuitamain u vegnir chargiadas giu sco PDF.
Infurmaziuns detagliadas davart la refurma da la AVS (AVS 21) chattais Vus en la broschura«Stabilisaziun da la AVS (AVS 21). Tge mida?»
Infurmaziuns davart la renta da vegliadetgna flexibla e davart l’entrada en la vegliadetgna da pensiun chattais Vus sin la pagina Retratga flexibla da la renta da las assicuranzas socialas e sin la pagina Entradas suenter il pensiunament da ch.ch.
Sche Vus vegnis pensiunada u pensiunà, duessas Vus pensar da far in'assicuranza d’accidents. Fin ussa eras Vus numnadamain assicurada u assicurà tar Vossa patruna u Voss patrun cunter accidents.