Sche Vus essas ina persuna da l’exteriur, è la midada en Svizra er colliada cun formalitads per ina dimora. Sin ch.ch chattais Vus infurmaziuns davart las permissiuns da dimora e davart ils documents da viadi che Vus duvrais per entrar en Svizra.
Persunas che vivan a l’exteriur e che vulan prender domicil en Svizra, dastgan importar la gronda part da lur bains e da lur possess en Svizra senza stuair pajar dazi.
Questa regulaziun vala er, sche Vus planisais ina midada en in domicil secundar en Svizra. Per vehichels e per animals stuais Vus dentant pajar dazi.
Per che Vus possias importar mobiglias, animals da chasa, collecziuns u vehichels en Svizra senza stuair pajar dazi, ston pliras premissas esser ademplidas:
Vus stuais dischlocar Voss domicil en Svizra e laschar legalisar quai.
Attenziun: Studentas e students na ston betg ademplir questas premissas, sch’ellas u els vulan prender cun sai lur mobiglias, lur objects persunals usitads e lur material d’instrucziun.Vus stuais avair duvrà Voss bains e Voss possess durant almain sis mais avant la midada per Voss diever persunal ed als stuais er duvrar en il futur.
Vus stuais midar chasa durant las uras d’avertura d’in post da duana ch’è responsabel per rauba.
Tar il passagi dal cunfin stuais Vus preschentar plirs documents al post da duana:
glista cumpletta da tut ils bains che Vus vulais importar (sin in fegl separà)
formular (en dus exemplars) per importar Voss bains senza stuair pajar dazi; quest formular pudais Vus chargiar giu da la pagina d’internet dal Uffizi federal da la duana e da la segirezza dals cunfins
document d’identitad (passaport u carta d’identitad)
in document che cumprova che Vus avais annunzià la partenza tar las autoritads da Voss pajais d’origin
ina permissiun da dimora da la Svizra u in auter document che demussa la midada da domicil (p.ex. in contract da lavur u in contract da locaziun)
in document dal vehichel da l'exteriur u ina conferma d’admissiun (er sche quests documents èn gia scadids)
cumprova d’avair cumprà u prendì en locaziun in alloschi
N’emblidai betg da surdar quests documents ad in’eventuala interpresa da dischlocaziun incumbensada da Vus.
Il passagi dal cunfin na stuais Vus betg annunziar ordavant a la duana. Quest pass vegn dentant recumandà per accelerar il process da las formalitads a tscherts posts da duana. L’Uffizi federal da la duana e da la segirezza dals cunfins ha mess a disposiziun ina glista dals posts da duana che vegnan en dumonda sco er ulteriuras infurmaziuns sin la pagina d’internet Vegnir a star en Svizra (bains da translocaziun).
Sche Vus vulais importar Voss bains e Voss possess senza stuair pajar dazi, stuais Vus far quai entaifer dus onns a partir dal mument da la midada.
Per ulteriuras infurmaziuns pudais Vus consultar la glista cun las dumondas frequentas (FAQ davart ils bains da dischlocaziun) sin la pagina d’internet da l'Uffizi federal da la duana e da la segirezza dals cunfins.
Per savair dapli davart il tema «prender en locaziun in’abitaziun» pudais Vus consultar il fegl d’infurmaziun «Abitar en Svizra» che stat a disposiziun en 19 linguas.
Ch.ch As infurmescha davart las permissiuns da dimora, davart ils documents da viadi necessaris per entrar en Svizra e davart l’acquist d’immobiglias tras persunas estras.