Sche Vus As laschais vaccinar cunter ina malsogna, na vegnis Vus per regla betg pli malsauna u malsaun. Vus na pudais er strusch pli infectar autras persunas cun il virus. Sche avunda umans èn vaccinads, daventa ina malsogna rara u svanescha perfin.
Tschertas vaccinaziuns protegian oravant tut cunter cumplicaziuns severas, ina transmissiun resta anc adina pussaivla, è però main frequenta.
Cun ina squitta, sco vaccinaziun orala sur la bucca u sco spray sur il nas arriva in vaccin en il corp. La vaccinaziun è il meglier exercizi per il cas d’urgenza: Tras agents patogens (u parts d’agents patogens) betg privlus simulescha il vaccin la penetraziun da bacterias u da virus privlus en il corp. Il sistem d’immunitad vegn activà, emprenda da far frunt a quests patogens e vegn uschia preparà en moda optimala. Sche noss corp vegn pli tard propi en contact cun bacterias u cun virus ch’èn nuschaivels per la sanadad, po el dustar quels en moda speditiva ed intenziunada, avant ch’i dat cumplicaziuns severas.
Avant l’admissiun vegnan tut las vaccinaziuns examinadas exactamain. La ristga per la sanadad colliada cun las vaccinaziuns è extremamain pitschna. Effects secundars cumparan fitg darar. En mintga cas è ina vaccinaziun per Vus bler pli pauc privlusa che sche Vus suffris da la malsogna.
En paucs cas datti motivs da sanadad cunter la vaccinaziun. Discutai davart quai cun la media u il medi.
La Confederaziun recumonda numerusas vaccinaziuns.
Ad uffants pitschens ed ad uffants recumonda l’Uffizi federal da sanadad publica radund in tozzel vaccinaziuns. Tut tenor basegn da segirezza e tut tenor stadi da sanadad da l’uffant fan ulteriuras vaccinaziuns senn. Detagls chattais Vus sin la pagina Vaccinaziuns per uffants pitschens e per uffants. Vus As pudais er infurmar tar Vossa media u tar Voss medi.
Ils custs per las vaccinaziuns da basa ed eventualmain er per ulteriuras vaccinaziuns surpiglia la cassa da malsauns – resguardond la franschisa e la resalva persunala.
En la vegliadetgna tranter 11 e 15 onns duessan intginas vaccinaziuns vegnir repetidas u prendidas suenter. Autras vaccinaziuns vegnan fatgas supplementarmain. Il motiv: Giuvenils s’infecteschan plitost cun tschertas malsognas u ston en cas d’ina infecziun quintar cun in svilup da malsogna pli grev che uffants. En emprima lingia è quai la vaccinaziun cunter Humane Papillomaviren (HPV) che po chaschunar cancer dal culiez da la madra ed autras sorts da cancer. La vaccinaziun cunter hepatitis B vegn recumandada a tut la glieud giuvna che n’ha betg survegnì questa vaccinaziun sco uffant pitschen. Tgi che n’ha betg fatg tras la virola selvadia sco uffant sa duess er vaccinar cunter questa malsogna. Tut tenor situaziun fan autras vaccinaziuns senn. Infurmaziuns chattais Vus sin la pagina Vaccinaziuns per giuvenils.
Er sco persuna creschida duessas Vus da temp en temp rinfrestgar Vossas vaccinaziuns. En emprima lingia èn quai las vaccinaziuns cunter difteria, tuss chanina e tetanus. Plinavant pudais Vus prender suenter vaccinaziuns impurtantas, en spezial quellas cunter virustgel, glandun e rubella.
Sche Vus faschais part d’ina gruppa periclitada, vegnan ulteriuras vaccinaziuns recumandadas. Infurmaziuns detagliadas chattais Vus sin la pagina Vaccinaziuns per persunas creschidas.
Infurmaziuns actualas e detagliadas chattais Vus sut Coronavirus: vaccinaziun.
Tar uffants pitschens, persunas pli veglias (a partir da 65 onns), dunnas en speranza u persunas cun malsognas cronicas po ina grippa sa sviluppar grevamain. La meglra protecziun è la vaccinaziun cunter la grippa. Perquai recumonda la Confederaziun la vaccinaziun cunter la grippa a tut las persunas da las gruppas periclitadas numnadas (auter che per uffants pitschens fin 6 mais) sco er a tuttas e tuts che stattan en in contact stretg cun questa persuna. Sch’ina vaccinaziun fa senn per Vus, As mussa il check da vaccinaziun cunter la grippa.
Cunquai ch’ils virus grippals sa sviluppan permanentamain dovri mintga atun ina nova vaccinaziun. En il cas ideal As vaccinais Vus a partir da l’october fin il cumenzament da l’epidemia da grippa. Mintgamai il november ha lieu in di da vaccinaziun naziunal cunter la grippa. Perfin en cas d'ina vaccinaziun cunter la grippa en il december u pli tard resta avunda temp per che Voss sistem d’immunitad possia sviluppar ina protecziun. Ils ultims decennis ha l’epidemia da grippa stagiunala mintgamai cumenzà insacura tranter december e mars.
Cun ina vaccinaziun cunter FSME As pudais Vus proteger cunter ina inflammaziun dal tscharvè (er enconuschenta sco «Frühsommer-Meningoenzephalitis» (FSME)). Questa malsogna virala vegn chaschunada da la piztgada d’ina zecca infectusa.
La vaccinaziun cunter zeccas vegn recumandada a tut las persunas a partir da 3 onns che passentan temp en territoris da ristga. Uffants a partir d’in onn pon vegnir vaccinads sch’els èn savens exposts al privel da piztgadas da zeccas infectusas. La Svizra vala – cun excepziun dal chantun Tessin – sco territori da ristga. La vaccinaziun protegia mo la persuna vaccinada. FSME na vegn betg transmess d’uman ad uman.
Impurtant: La vaccinaziun cunter zeccas na protegia BETG cunter la borreliosa, che vegn medemamain transmessa da zeccas. Borreliosa po percunter vegnir tractada cun antibiotica.
Vus As duessas infurmar il pli tard quatter fin sis emnas avant il viadi. Tge vaccinaziuns èn necessarias ed As duais Vus proteger cunter malaria? Infurmaziuns chattais Vus sin www.healthytravel.ch. Sche Vus viagiais en in pajais u en ina regiun cun ina ristga da sanadad augmentada, As duessas Vus laschar cussegliar medicinalmain d’ina media u d’in medi pertutgant il viadi.
Attenziun: En tscherts pajais èn vaccinaziuns specificas obligatoricas.