Vus pudais prender domicil en Svizra senza avair in‘activitad da gudogn, sche Vus disponis dal suandant:
avunda meds finanzials per che Vus sajas finanzialmain independenta u independent e betg dependenta u dependent da l’agid social
in’assicuranza da malsauns che surpiglia er custs d’accident
en cas che Vus vulais studegiar: ina conferma che Vus essas admessa u admess al studi en in lieu da furmaziun (attestaziun d’immatriculaziun).
Per dimoras da maximalmain 90 dis entaifer 6 mais na duvrais Vus nagina permissiun. Per dimoras pli lungas stuais Vus As drizzar a l’autoritad da migraziun chantunala sche Vus n’avais nagina activitad da gudogn.
La permissiun da dimora UE/AECL è valaivla 5 onns e vegn prolungada automaticamain, sche las premissas èn accumplidas er vinavant. Per studentas e students vegn emessa ina permissiun da dimora per la durada dal studi u mintgamai per in onn cun ina prolungaziun annuala fin la fin da la scolaziun.
Dapi il 1. da schaner 2021 n’èn las burgaisas ed ils burgais dal Reginavel Unì betg pli burgaisas u burgais da la UE. Per Vus valan ussa las disposiziuns per burgaisas e burgais d’in terz stadi.
En cas che Vus avevas gia avant l’onn 2021 in dretg da dimora en Svizra, pudais Vus profitar da las disposiziuns spezialas da la Cunvegna tranter la Svizra ed il Reginavel Unì davart ils dretgs acquistads da las burgaisas e dals burgais.
Ulteriuras infurmaziuns chattais Vus sin la pagina davart il Reginavel Unì dal Secretariat da stadi per migraziun davart il Reginavel Unì sco er sut la rubrica Vus n’essas betg burgaisa u burgais da la UE/AECL.
Sche Vus na duvrais betg in visum e sche Vus na lavurais betg, pudais Vus star en Svizra senza permissiun da dimora per maximalmain trais mais. Cun il «calculatur da segiurn» pudais Vus controllar, sche Voss segiurn surpassa la limita per segiurns curts u betg.
Sche Vus vulais star pli ditg, stuais Vus inoltrar ina dumonda per ina permissiun da dimora a l’uffizi da migraziun chantunal da Voss lieu da dimora previs. Tut tenor la naziunalitad stuais Vus er anc inoltrar ina dumonda per in visum tar ina represchentanza svizra a l’exteriur.
Ultra da quai stuais Vus disponer dal suandant:
avunda meds finanzials per che Vus sajas finanzialmain independenta u independent e betg dependenta u dependent da l’agid social
in’assicuranza da malsauns che surpiglia er custs d’accident,
in alloschi adattà.
Sco studenta u student stuais Vus ultra da quai agiuntar ils suandants documents:
Voss plan da studi persunal cun inditgar la finamira da Voss studi
ina conferma che Vus essas admessa u admess al studi en in lieu da furmaziun (attestaziun d’immatriculaziun)
Voss curs da la vita (curriculum vitae)
ina garanzia che Vus bandunais la Svizra suenter la finiziun dal studi.
Sin las paginas dal Secretariat da stadi per migraziun chattais Vus infurmaziuns davart la dimora en Svizra senza activitad da gudogn.
Qua chattais Vus disposiziuns per burgaisas e burgais dal Reginavel Unì.
Qua chattais Vus ina glista cun indicaziuns da tut las autoritads da migraziun e dal martgà da lavur chantunalas.
Vus chattais il «calculatur da segiurns curts» tar il Secretariat da stadi per migraziun.
Il Departament d’affars exteriurs As metta a disposiziun qua las indicaziuns da las represchentanzas svizras a l’exteriur.
Infurmaziuns davart l’assicuranza da malsauns chattais Vus sin la pagina correspundenta da ch.ch.