Cura cumenza mes uffant la scolina?
Per regla cumenza Voss uffant cun 4 onns la scolina u il stgalim fundamental u da basa. Il di da referenza per la scolarisaziun è normalmain ils 31 da fanadur. Quai vul dir: Sche Voss uffant festivescha il 4. anniversari avant la fin da fanadur, cumenza el la scolina suenter las vacanzas da stad. Intgins chantuns da la Svizra Orientala e da la Svizra Centrala han in auter di da referenza.
Forsa vulais Vus laschar cumenzar Voss uffant pli tard (u pli baud) la scolina u il stgalim fundamental u da basa. En la gronda part dals chantuns stuais Vus far per quai ina dumonda a l'autoritad da scola. En auters chantuns pudais Vus decider sezza u sez.
Quant ditg dura il temp da scola obligatoric?
En ils blers chantuns sto Voss uffant ir 11 onns a scola, inclusiv la scolina.
Il stgalim primar cun la scolina dura normalmain 8 onns. Il stgalim secundar dura il pli savens 3 onns. En il Tessin dura il stgalim primar 7 onns, il stgalim secundar 4 onns.
Sin la pagina d'internet da la Conferenza svizra da las directuras e dals directurs chantunals da l'educaziun publica chattais Vus ina survista da las structuras da scola per mintga chantun.
Igl è er pussaivel da laschar ir Voss uffant en ina scola privata u – sut tschertas circumstanzas – da l'instruir a chasa (homeschooling). As infurmai tar Voss chantun davart las reglas e las cundiziuns detagliadas.
La scola ha la finamira dad er integrar ils uffants che han difficultads en scola, ils uffants da lingua estra ed ils uffants spezialmain talentads en las classas normalas.
Per ils uffants ch'èn spezialmain talentads datti en emprima lingia la pussaivladad d'ir a scola pli baud u da sursiglir ina classa. Per ils uffants da lingua estra stattan a disposiziun curs da lingua intensivs accumpagnants. E per ils uffants che han difficultads en scola existan numerusas mesiras en il rom d'ina classa normala.
Sch'i n'è tuttina betg pussaivel u raschunaivel d'integrar Voss uffant en ina classa normala, po el entrar en ina classa u en ina scola speziala ch'è adattada a ses basegns.
L'onn da scola cumenza l'avust.
Il chalender da vacanzas da tut ils chantuns As mussa, cura che las vacanzas da scola han lieu en mintga chantun. Il chalender da vacanzas da Vossa scola chattais Vus sin la pagina d'internet da la vischnanca u da la scola.
La responsabladad per la via da scola han ils geniturs. Vus decidais, co che Voss uffant arriva en scola. Las vischnancas prendan mesiras mo, sche la via da scola è per exempel fitg lunga u memia privlusa.
Per uffants pitschens po il Pedibus – ils «pes sco bus da scola» esser ina buna soluziun. Persunas creschidas voluntaras accumpognan gruppas d'uffants sin lur via da scola.
Per ina via da scola segira
Sco geniturs contribuis Vus a la segirezza, sche Vus mussais a Voss uffant da sa cumportar correctamain en il traffic sin via. I vala anc adina: «spetgar, guardar, tadlar, chaminar.»
Sco manischunza u manischunz contribuis Vus ad ina via da scola segira, sche Vus guidais cun attenziun. Resguardai ils placats correspundents, cura che la scola cumenza suenter las vacanzas da stad.