Il numer d’urgenza il pli impurtant en Svizra ed en Europa è il 112. El As collia en mintga situaziun d’urgenza cun la centrala d’alarm da la Polizia. Vus la pudais er telefonar cun ina carta da SIM estra u cun ina carta da prepaid senza dabun.
Ulteriurs numers d’urgenza | |
|---|---|
Polizia | 117 |
Pumpiers | 118 |
Maun offert | 20 fin 70 raps per discurs |
Ambulanza | 144 |
Clom d’agid en cas d’intoxicaziun | 145 |
Agid al telefon per uffants e giuvenils (Pro Juventute) | 147 |
Polizia da transport da la VFF | 0800 117 117 |
Helpline dal Departament federal d’affars exteriurs DFAE (Servetschs consulars) | 0800 247 365 u 058 465 33 33, Da l’exteriur: +41 800 247 365 u +41 58 465 33 33 |
Smanatscha en Svizra in privel direct per la populaziun, vegn ella alarmada cun in alarm da sirena. I dat dus segns d’alarm:
L’alarm general strasuna en cas d’ina eventuala periclitaziun da la populaziun. Igl è in tun regular ascendent e descendent che dura 1 minuta e che vegn repetì durant las proximas 5 minutas: https://youtu.be/6x93o2HDSLA
L’alarm d’aua sa fa udir sulettamain en territoris periclitads ch'èn situads sut implants da fermada. El consista ord 12 tuns bass da mintgamai 20 secundas en ina distanza da mintgamai 10 secundas: https://youtu.be/Z0CBTr5FFZ4
Adina l’emprima mesemna dal favrer ha lieu il test da sirena annual.
Ulteriuras infurmaziuns davart ils signals d’alarm dat l’Uffizi federal da protecziun da la populaziun.
La App d’Alertswiss As alarmescha ed As infurmescha en cas da privels sco auazuns u il privel d’incendis da guaud ed As alarmescha, sch’i dat catastrofas sco per exempel in accident da chemia resp. d’ovra atomara u era en cas d’in privel da terror.
Tge far en cas d’in alarm general?
As infurmai sur l’app u sin la pagina d’internet d’Alertswiss e tadlai radio. Ils emetturs da la SSR e blers radios privats infurmeschan en cas da catastrofas davart las instrucziuns da cumportament da las autoritads.
Suandai las instrucziuns.
Infurmai ils vischins.
Tge far en cas d’in alarm d’aua?
Bandunai immediatamain il territori periclità.
Resguardai ils fegls d’infurmaziun al lieu, las instrucziuns da las autoritads ed As infurmai sur l’app Alertswiss.
Sch’i brischa quinta mintga secunda. Las trais reglas da cumportament en cas da fieu èn: alarmar – salvar - stizzar.
Alarmar : Telefonar al 118 (pumpiers) Avertir persunas en privel
Salvar :S alvar umans ed animals Betg sa periclitar sasezza u sasez
Stizzar : Cumbatter il fieu Inditgar la via a las persunas en acziun
Ulteriuras infurmaziuns davart il cumportament correct en cas da fieu
Sche Vus essas involvida u involvì en in accident da traffic, stuais Vus immediatamain fermar l'auto. I na gioga nagina rolla tgi ch’è la culpa da l’accident. Sche Vus na fermais betg u sche Vus As allontanais dal lieu d’accident, As faschais Vus chastiabla u chastiabel. Vegnan persunas blessadas u mazzadas, vala il betg fermar l'auto al lieu d’accident u bandunar il lieu d'accident sco fugia suenter in accident.
Tge far en cas d'in accident da traffic?
As faschai ina survista.
Segirai il lieu d’accident.
Prestai agid d’urgenza.
Alarmai ils servetschs da salvament.
Glista da controlla detagliada davart il cumportament en cas d'in accident da traffic (DE/FR) Incidenti stradali - POL (DI) - (Repubblica e Cantone Ticino)
Tge far en cas d'in accident sin l'autostrada?
En cas d'accidents sin l’autostrada vala supplementarmain:
Manischai il vehichel sche pussaivel immediatamain sin il vial da panna ed envidai las glischs d’avertiment.
Alarmai la Polizia (117 u 112) avant che Vus vegnis ord l'auto observond il traffic.
Na bandunai betg il vehichel, sche Vus arrivais uschia sezza u sez en ina situaziun privlusa.
Sche Vus avais bandunà il vehichel, purtai in gilet da segirezza per Vossa atgna protecziun.
As mettai en segirtad ordaifer la via.
Chaminai per lung dal vial da panna en direcziun cuntraria al traffic e muvai il triangul da panna si e giu.
Plazzai il triangul da panna bain visibel almain 100 m davent dal lieu d’accident per al segirar.
Donns al vehichel
Sche vehichels han subì in donn, faschais Vus il suandant:
Na muventai betg ils vehichels e fotografai ils vehichels donnegiads da tuttas varts pussaivlas.
Empleni il protocol d’accident europeic; el sa chatta en mintga caum da guants. Probablamain al avais Vus survegnì d’ina assicuranza. Vus al pudais er chargiar giu ((Download TCS)) u retrair tar la Polizia.
Telefonai adina la Polizia – er sche persunas èn mo vegnidas blessadas levamain – en cas che las persunas involvidas fan difficultads u er en cas da dubi.
Annunziai il donn immediatamain a l’assicuranza.
App Alertswiss: alarmescha ed infurmescha en cas da privels e da catastrofas - gratuit https://www.alert.swiss/de/app.html
Clom d’urgenza automatic e pass d’urgenza sin il smartphone: directiva
App d’emprim agid da la CCS (Crusch Cotschna Svizra) – gratuit