Avant che Vus dastgais ir a chatscha, stuais Vus reussir in examen. Ils curs da scolaziun èn reglads sin plaun chantunal e duran fin 3 onns. In pèr chantuns renconuschan ils diploms d'auters chantuns.

Sche Vus avais reussì l'examen da chatscha, pudais Vus acquistar ina patenta da chatscha en la gronda part dals chantuns. En auters chantuns stuais Vus daventar commembra u commember ubain giast d'ina societad da chatscha, per che Vus dastgias ir a chatscha. As infurmai per plaschair tar quel chantun, en il qual Vus vulais ir a chatscha.

Nua e tge vala en cas da la chatscha da patenta?

En la gronda part dals chantuns pudais Vus ir a chatscha sin l'entir territori chantunal, sche Vus avais cumprà la patenta dal chantun. Vus dastgais sajettar in tschert dumber d'animals. Quest dumber stat scrit sin la patenta. Là vegni er remartgà, quant ditg che la patenta vala.

Vus na dastgais betg ir a chatscha en ils territoris federals e chantunals da protecziun sco territoris scumandads per la chatscha u reservats d'utschels d'aua e d'utschels migrants.

Chantuns cun chatscha da patenta èn: Berna, Uri, Sviz, Sursilvania, Sutsilvania, Glaruna, Zug, Friburg, Appenzell Dadora, Appenzell Dadens, Grischun, Tessin, Vad, Vallais, Neuchâtel e Giura.

Nua e tge vala en cas da la chatscha da revier?

En intgins chantuns dattan las vischnancas a tschains il dretg d'ir a chatscha ad ina societad da chatscha. Sco commembra u commember ubain sco giast da questa societad da chatscha dastgais Vus ir a chatscha sin il territori prendì a tschains.

Chantuns cun chatscha da revier èn: Turitg, Lucerna, Soloturn, Basilea-Citad, Basilea-Champagna, Schaffusa, Son Gagl, Argovia e Turgovia.

Vus na dastgais betg ir a chatscha en il chantun Genevra. Là reguleschan guardiaselvaschina statals las populaziuns da selvaschina.

Vus stuais cumprovar regularmain, che Vus essas segira u segir da culp. Cas cuntrari na dastgais Vus betg ir a chatscha. La gronda part dals chantuns pretenda, che Vus giajas mintga onn a trair en in implant da tir da chatscha renconuschì e che Vus cumprovias che Vus culpis.

Ulteriuras infurmaziuns davart l'obligaziun da tir e davart implants da tir renconuschids chattais Vus tar il post cumpetent dal chantun.

La stagiun da chatscha na dura betg l'entir onn. I dat temps da schanetg, durant ils quals Vus na dastgais betg ir a chatscha. La Confederaziun fixescha ils temps da schanetg per mintga spezia d'animals. Ils chantuns pon reducir la stagiun da chatscha u restrenscher la glista da quellas spezias che Vus dastgais sajettar. As infurmai tar il post cumpetent dal chantun, cura e tge animal che Vus dastgais sajettar.

Sche Vus vulais duvrar chauns da chatscha, duvrais Vus ina scolaziun e stuais reussir examens. As infurmai tar il post cumpetent dal chantun, sut tge premissas che Vus pudais duvrar chauns da chatscha.