Las reglas da l'Uniun europeica valan dapi l'onn 2023 er en Svizra. Ultra da quai datti reglas naziunalas ed – en intgins chantuns ed en intginas vischnancas – ulteriuras restricziuns per la protecziun da l'ambient e da las persunas.

Questas reglas valan per tut las dronas:

- la vegliadetgna minimala per sgular ina drona è 12 onns
- tgi che sgola ina drona cun camera, sto sa registrar
- ins sto adina avair ina vista libra sin la drona
- l'autezza da sgol maximala è 120 m
- ins sto tegnair avunda distanza davent da persunas ch'è n'èn betg participadas al sgol
- ins na dastga betg sgular sur gruppas da glieud

Faschai attenziun, che Vossa drona haja in signet CE, quai è obligatoric en la UE ed en Svizra.

Bunamain tut las pilotas ed ils pilots da dronas ston sa registrar tar l'Uffizi federal d'aviatica civila sut l'adressa UAS.gate . Pilotas e pilots da dronas che paisan damain che 250 grams, èn exceptads da l'obligaziun da registraziun, sche la drona na po betg registrar datas persunalas. Quai vul dir, che mintga pilota e pilot d’ina drona cun camera sto vegnir registrà – ina camera po numnadamain fotografar fatschas e pia registrar datas persunalas. La registraziun è gratuita e Vus duvrais in login CH.

Tut las pilotas ed ils pilots da dronas da 250 grams e dapli ston absolver in test online. Per far la scolaziun ed il test online duvrais Vus circa 4 uras. Per dumagnar l'examen stuais Vus respunder 75 % da las dumondas correctamain. Tgi che vul sgular tenor las reglas da la sutcategoria A2, sto absolver in examen persunal . Il certificat vala 5 onns. L'examen per sgular dronas da 900 grams fin 4 kilograms stuais Vus far al lieu. Certificats da stadis da l’UE èn valaivels en Svizra e viceversa

I dat trais categorias principalas: categoria «averta», «speziala» e «certifitgada». La gronda part dals sgols da dronas vegnan fatgs en la categoria averta. En questa categoria survegn mintga drona ina classa (C0 fin C4) – tala determinescha la classa da sgol (A1 fin A3). En la categoria averta na dastgais Vus betg pli sgular sur gruppas da glieud dapi il 2023. Sche Vossa drona n'è betg marcada cun ina classa, valan per Vus reglas levamain adattadas.

Sche Vus na pudais betg observar ils princips da la categoria averta, sgulais Vus en la categoria speziala e duvrais perquai ina permissiun dal UFAC.

En Svizra datti areals, nua ch'igl è scumandà da sgular dronas u nua ch'ins po sgular ina drona mo cun ina permissiun, per exempel en la vischinanza da plazzas aviaticas, da territoris da protecziun da la natira e d'ospitals. La charta da zonas da sgol dal UFAC e l'app «swisstopo» mussan, en tge territoris che Vus dastgais sgular, nua ch'i dat restricziuns e nua ch'igl è scumandà da sgular dronas. L'app determinescha plinavant Vossa posiziun. Ils posts da contact per permissiuns vesais Vus, sche Vus cliccais sin il territori respectiv sin la charta.

Sche Vus n'As registrais betg sco pilota u pilot d'ina drona u sche Vus sgulais ina drona senza la permissiun necessaria, cuntrafaschais Vus a la Lescha federala davart l'aviatica. Las consequenzas pon esser, che Vus stuais far ina scolaziun posteriura, dar giu la licenza, pajar ina multa da fin 20 000 francs u schizunt ir en praschun. L'import da la multa vegn fixada individualmain tras la dretgira, perquai ch'i na dat betg in catalog da multas sco en il traffic sin via.

Per ina drona da 250 grams e dapli duvrais Vus en Svizra in'assicuranza da responsabladad cun ina summa da garanzia d'almain 1 milliun francs. Ina tala vegn recumandada er per dronas pli pitschnas.

Sur gruppas da persunas – per exempel d'ina nozza u d'ina occurrenza publica – na dastgais Vus en general betg sgular cun ina drona da la categoria averta. La classa da sgol da Vossa drona fixescha la distanza che Vus stuais tegnair davent da persunas, che n'èn betg infurmadas davart il sgol da la drona e davart las mesiras da segirezza e che n'han betg dà lur consentiment.

In post general per reclamaziuns cunter sgols da dronas ch'èn scumandads u che disturban, na datti betg. Il meglier discurris Vus persunalmain cun la persuna che sgola la drona. Sche quai na porta nagut, pudais Vus reclamar tar la polizia.