Il servetsch civil è il servetsch da cumpensaziun civil al servetsch militar. El stat liber mo a persunas obligadas da far servetsch che na pon betg metter d'accord il servetsch militar cun lur conscienza. Ils engaschaments han lieu principalmain en ils secturs da sanadad e da la lavur sociala sco er en il sectur da l’ambient.
Per pudair far servetsch civil stuais Vus ademplir quatter premissas:
Vus avais visità la recrutaziun ed essas vegnì giuditgà sco abel da far servetsch militar
Il servetsch militar na cunvegn betg cun Vossa conscienza
Vus essas pront da prestar 1,5 giadas uschè blers dis da servetsch sco en l’armada
Vus inoltrais ina dumonda, visitais il di d’introducziun entaifer 3 mais e confermais la dumonda
Inoltrar la dumonda
Ina dumonda per il servetsch civil pudais Vus inoltrar il pli baud suenter che Vus essas vegnida valitada u vegnì valità – a chaschun da la recrutaziun ((interner Link)) – sco abla u abel per il servetsch militar.
Sche Vus inoltrais Vossa dumonda pir pli tard durant in servetsch militar en curs, stuais Vus far vinavant quest servetsch militar, fin che Vus avais survegnì la decisiun d'admissiun al servetsch civil. Excepziuns: Sche Vus inoltrais Vossa dumonda 3 mais avant la scola da recrut u 3 mais avant in curs da repetiziun, na stuais Vus betg entrar en servetsch.
La dumonda pudais Vus inoltrar mo sin via electronica. As infurmai sin la pagina d'internet da l'Uffizi federal dal servetsch civil CIVI. Là pudais Vus lura As registrar en E-ZIVI, il portal da servetsch dal Servetsch civil. Sche Vus n'avais nagin access a l’internet, As drizzai per telefon al Center regiunal cumpetent.
Sche Vus avais inoltrà Vossa dumonda, pudais Vus As annunziar sur Voss conto per in di d'introducziun en Vossa regiun; Vus stuais absolver quel di entaifer 3 mais. Ils dis d'introducziun han lieu mo durant l'emna ed il dumber da participantas e participants è limità.
Suenter che Vus avais frequentà cun success il di d'introducziun, stuais Vus confermar Vossa dumonda entaifer 2 emnas. Pir suenter la conferma vegnis Vus admessa u admess al servetsch civil.
Servetsch civil – quant ditg?
Il servetsch civil dura ina giada e mez uschè ditg sco il servetsch militar. Sche Vus n'avais betg frequentà la scola da recrut u sche Vus na l'avais betg terminada, stuais Vus far in engaschament lung. Quest engaschament dura almain 180 dis (6 mais) e sto vegnir absolvì fin la fin dal 3. onn chalendar suenter l'admissiun. Plinavant stuais Vus prestar in engaschament d'almain 26 dis per onn.
Sche Vus avais reussì la scola da recrut, valan autras reglas.
Engaschaments da servetsch civil – nua e cura?
Vus faschais Voss engaschaments entaifer ils otg champs d'activitad dal Servetsch civil, en emprima lingia en ils secturs da sanadad e da la lavur sociala sco er en la protecziun da l'ambient e da la natira.
Vus fixais sezza u sez, cura durant l'onn e nua che Vus faschais Voss servetsch:
Dumondas detagliadas discutais Vus cun il Center regiunal cumpetent
Tschertgai in engaschament pussaivel sin «E-ZIVI» sut «Tschertgar e fixar l'engaschament».
As annunziai tar il manaschi cunvegnent.
Sch'i vegn fixada ina cunvegna d'engaschament, vegnis Vus clamada u clamà dal Center regiunal a l'engaschament.
Sche Vus na fixais nagin engaschament u al fixais memia tard, fixescha l'Uffizi federal dal servetsch civil, nua e cura che Vus faschais Voss servetsch.
Engaschaments parzials na datti betg, il servetsch civil po mo vegnir fatg a temp cumplain.
Dumondas detagliadas discutais Vus cun il Center regiunal cumpetent.
Servetsch civil – cumpensaziun da salari e sold
Per mintga di da servetsch avais Vus il dretg d'ina cumpensaziun dal gudogn. L'autezza da quella sa drizza da princip tenor Vossas entradas d’avant il servetsch civil. Persunas senza activitad da gudogn sco scolaras e scolars u persunas dischoccupadas han er il dretg d'ina cumpensaziun dal gudogn.
Vus essas ina persuna cun activitad da gudogn: Lura importa l'indemnisaziun fundamentala 80 % da las entradas mesaunas d'avant il servetsch. Fixads èn in import minimal da 69 francs per di ed in import maximal da 220 francs per di.
Vus n'avais betg absolvì la scola da recrut: Lura survegnis Vus durant ils emprims 124 dis da servetsch civil (tut tenor il gener da truppa, al qual Vus eras attribuida u attribuì en il militar, ev. er pli ditg) l'import minimal da 69 francs per di – independentamain dal fatg, sche Vus avevas in'activitad da gudogn avant il servetsch u betg.
Vus avais agens uffants u uffants confidads: Lura survegnis Vus in supplement per uffants da 20 francs per uffant.
Daner da giaglioffa u sold: Per mintga di da servetsch survegnis Vus plinavant 7.50 CHF dal manaschi d'engaschament.
Sche Vus faschais main che 26 dis da servetsch durant 1 onn, pajais Vus taglia d'exemziun dal servetsch militar. Questa taglia As vegn restituida, sche Vus avais ademplì dal tuttafatg Vossa obligaziun da servetsch.
Servetsch civil – spesas
Il manaschi d'engaschament As metta a disposiziun l'alimentaziun e l'alloschi. Sch'el na po betg far quai, survegnis Vus ina indemnisaziun. Sch'el na po betg far quai, survegnis Vus per l’alimentaziun ina indemnisaziun. Sche Vus duvrais vestgadira da lavur speziala e chalzers spezials, sto il manaschi procurar per tals u surpigliar ils custs per tals (max. 60 fr./mais u 240 fr./engaschament). La vestgadira dal servetsch civil pudais Vus retrair gratuitamain.