En Svizra datti trais pussanzas differentas: la pussanza executiva, la legislativa e la giudicativa. Questa separaziun exista a tuts stgalims dal stadi (Confederaziun, chantun, vischnanca). Ella impedescha l’abus da pussanza. Ina persuna po appartegnair a medem temp be ad ina da las trais pussanzas (al medem stgalim statal).
Il Cussegl federal è la regenza da la Svizra. El dirigia ils affars currents e metta en la pratica las leschas approvadas dal parlament. Mintgin dals set commembras e commembers dal Cussegl federal dirigia in departament. Cun la Chanzlia federala furman ils set departaments l’administraziun federala.
Il Parlament svizzer consista da duas chombras:
il Cussegl naziunal cun 200 commembras e commembers. Il dumber da sezs vegn attribuì a mintga chantun proporziunalmain a basa da la populaziun. Mintga chantun ha il dretg sin almain in sez.
il Cussegl dals chantuns cun 46 commembras e commembers. Mintga chantun ha dus sezs (ils anteriurs mezs chantuns han be in).
Ils dus cussegls èn eguals e furman ensemen l’Assamblea federala. Il Parlament svizzer elavura las leschas e surveglia la gestiun dal Cussegl federal e dal Tribunal federal. Las commembras ed ils commembers dal Parlament vegnan elegids dal pievel.
Il Tribunal federal è il tribunal suprem da la Svizra. Quel surveglia l’applicaziun unifurma dal dretg e protegia ils dretgs da las burgaisas e dals burgais. Plinavant giuditgescha el sco autoritad suprema las dispitas giuridicas tranter burgaisas u burgais ed il stadi sco era tranter la Confederaziun ed ils chantuns.
La separaziun da la legislativa, da l'executiva e da la giudicativa na vala betg mo sin plaun federal, mabain er sin plaun chantunal e communal. Er qua duai vegnir impedida la concentraziun da la pussanza tar singulas persunas u instituziuns e duai vegnir evità l'abus da la pussanza.