Ina partida politica è ina gruppa da persunas che han las medemas ideas politicas e che s'uneschan per realisar questas ideas. Savens sa fatschentan las partidas cun la rolla e cun l'organisaziun dal stadi, cun il sistem economic e social u cun l'ambient.
Las partidas da la sanestra s'engaschan tradiziunalmain per in ferm stadi social. Las partidas da la dretga da la Svizra – era numnadas partidas «burgaisas» – mettan il focus sin dapli atgna responsabladad e sin ina politica economica liberala. Las partidas dal center partan tschertas ideas cun las partidas da la sanestra, autras ideas cun las partidas da la dretga.
La cuntrada da partidas da la Svizra è fitg multifara. Intginas partidas èn activas sin plaun federal, chantunal e communal. Autras partidas existan percunter mo sin in plaun. Ina survista uffiziala da tut las partidas da la Svizra na datti betg. Il parlament ha dentant publitgà ina glista da tut las partidas ch'èn represchentadas en il parlament.
Dapi l'onn 1919 n'han naginas partidas cuntanschì dapli che 50 pertschient da las vuschs a chaschun da las elecziuns dal Cussegl naziunal. Uschia n'è nagina partida stada «partida da maioritad».
En il sistem democratic da la Svizra han las partidas ina rolla impurtanta. Las partidas gidan a furmar l'opiniun politica, mettan a disposiziun candidatas e candidats per uffizis publics e lantschan iniziativas u fan referendums. Per las votaziuns fan ellas recumandaziuns da votaziun.
La via per sa participar ad ina partida politica en Svizra sa differenziescha da partida a partida. As drizzai a la partida, a la quala Vus vulais As participar. Intginas partidas As envidan sco emprim ad in discurs. Tar autras partidas pudais Vus As registrar sco simpatisanta u simpatisant, avant che Vus As obligais per in engaschament fix.
Sco commembra u commember d'ina partida stuais Vus per regla pajar ina contribuziun annuala. L'autezza da questa contribuziun sa differenziescha da regiun a regiun sco er da partida a partida e dependa mintgatant er da las entradas.
En Svizra essas Vus libra u liber da fundar ina partida. Igl è relativamain simpel. La furma la pli usitada è l'uniun. Las premissas che ston vegnir ademplidas chattais Vus en ils artitgels 60–79 dal Cudesch civil.
Sche Vus fundais Vossa partida en la furma giuridica d'ina uniun, stuais Vus metter en scrit ils statuts. Cun ils statuts fixais Vus la finamira (orientaziun politica), la finanziaziun e l'organisaziun da l'uniun (organs da la partida).
La Chanzlia federala maina in register da las partidas. L'inscripziun n'è betg obligatorica. Las partidas che sa laschan inscriver profitan dentant da facilitaziuns administrativas a chaschun da las elecziuns dal Cussegl naziunal. Las premissas per ina inscripziun chattais Vus sin il formular d'annunzia che Vus pudais emplenir online.
Il parlament maina ina glista da tut las partidas ch'èn represchentadas en il parlament.
En ils artitgels 60–79 dal Cudesch civil chattais Vus las premissas per fundar ina partida en la furma giuridica d'ina uniun.
Vus pudais prender invista dal register da las partidas da la Chanzlia federala.
L'annunzia per laschar inscriver l'atgna partida en il register da las partidas po vegnir emplenida online.