Taglia sin la midada da proprietad

Tgi che cumpra ina chasa u in’abitaziun, sto pajar en tut ils chantuns la taglia sin la midada da proprietad u almain ina taxa per la midada da proprietad u dal cudesch funsil. Questa taglia u taxa vegn incassada, sch’ina immobiglia mida possessura u possessur. La summa da la taglia importa var 1 fin 3 pertschient dal pretsch da cumpra. Ils chantuns ch’incasseschan ina taxa, mettan a quint cun quella ils custs administrativs.

Valur da l’atgna locaziun

Tgi che abita en sia chasa u abitaziun da proprietad, sto declerar la uschenumnada valur sin l’atgna locaziun sco entrada. La valur da l’atgna locaziun importa var 60 fin 70 pertschient da quai ch’in object cumparabel custass en locaziun. Sco proprietaria u proprietari da proprietad d’abitar pajais Vus damai taglia supplementara. En la decleraziun da taglia  pudais Vus percunter deducir da Vossas entradas ils custs per tschains ipotecars e ed ils custs da mantegniment.

Taglia sin immobiglias

Tgi che posseda proprietad d’abitar, sto er pajar – en bun la mesadad dals chantuns – la taglia sin immobiglias. La taglia è proporziunala ed importa var 0.1 fin 3 promils da la valur stimada d’ina immobiglia. Obligads da pajar taglia èn las proprietarias u ils cumproprietaris ch’èn registrads en il cudesch funsil.

Taglia sin la facultad

Tgi che posseda in’abitaziun, ina chasa u terren, sto declerar quai en la decleraziun da taglia e pajar taglia sin la facultad per la valur da la proprietad. Debits ipotecars pudais Vus deducir da questa valur da facultad, cura che Vus emplenis la decleraziun da taglia.

Possedais Vus ina segunda abitaziun u ina chasa da vacanzas?

La valur da l’atgna locaziun, la taglia sin immobiglias e la taglia sin la facultad (guardar survart) vegnan incassadas er sin segundas abitaziuns u sin chasas da vacanzas, e quai en il chantun, nua ch’ellas sa chattan. Per regla na stuais Vus dentant betg emplenir duas decleraziuns da taglia. I basta, sch’il chantun da Voss domicil da vacanzas survegn ina copia.

Er per chasas da vacanzas a l’exteriur vala il suandant: taglia sin immobiglias èn da pajar là, nua che las immobiglias sa chattan. Vus na pajais damai betg la taglia en Svizra, mabain a l’exteriur. Vus stuais dentant tuttina inditgar la chasa da vacanzas en la decleraziun da taglia, perquai ch’ella vegn resguardada tar la fixaziun da la tariffa da taglia per Vossas entradas e per Vossa facultad en Svizra.

Taglia sin il gudogn tras la vendita da bains immobigliars

Tgi che venda sia chasa, sia abitaziun u ses terren e fa in gudogn, sto pajar taglia per quel en tut ils chantuns. Quest gudogn po esser aut, sche Vus avais cumprà la proprietad d’abitar avant blers onns, cura ch’ils pretschs eran bler pli bass.

Tge part dal gudogn che Vus stuais pajar sco taglia dependa perquai en la gronda part dals chantuns dal temp, durant il qual Vus eras possessura u possessur da la chasa: pli lditg che Vus eras possessura u possessur, pli bassa che la taglia sin il gudogn tras la vendita da bains immobigliars è. La taglia per gudogns tras la vendita da bains immobigliars che vegnan fatgs suenter in curt temp da proprietad, è dentant pli auta. Cun quai vulan ils chantuns franar la speculaziun.

Tar la cumpra, tar la vendita u tar dumondas davart la taglia poi esser cunvegnent d’enconuscher la valur da l’atgna immobiglia. Per stimaziuns approximativas porscha l’internet instruments online. Expertas ed experts per la valitaziun d’immobiglias chattais Vus tar l’Associaziun da l’economia immobigliara.