La Confederaziun incassescha la taglia anticipada sin gudogns d’investiziuns da daners – damai sin tschains e sin dividendas d’investuras e d’investurs. Da 100 % tschains transferescha la banca 65 % a las possessuras ed als possessurs dal conto e 35 % a l’Administraziun federala da taglia.

Cun la taglia anticipada vul la Confederaziun impedir la defraudaziun da taglia. Sch’ils pajataglias decleran lur gudogns da contos da banca e da vaglias a moda correcta en la decleraziun da taglia, survegnan ellas ed els enavos la taglia anticipada.

Il stadi incassescha directamain la taglia anticipada er da tscherts gudogns da lottaria e da gieus per daners. Las rentas e las prestaziuns d’assicuranzas (assicuranza da vita, 3. pitga) èn er suttamessas a la taglia anticipada. L’import da la taglia è qua dentant considerablamain pli bass che 35 % e dependa dal gener da la prestaziun.

Vus survegnis enavos la taglia anticipada, sche Vus declerais Voss gudogns da facultad (per exempel ils tschains da contos da banca u dividendas) en il register da vaglias da la decleraziun da taglia. Voss chantun As paja enavos la taglia anticipada. Per regla deducescha el l’import debità dal quint da la taglia chantunala.

Persunas giuridicas (per exempel interpresas u uniuns) pon pretender enavos la taglia anticipada directamain tar l’Administraziun federala da taglia.