La taglia sin la plivalur è ina taglia sin il consum ed ina funtauna d'entradas impurtanta per il stadi. Ella vegn pajada da las consumentas e dals consuments, vegn dentant incassada da las interpresas.
Il pretsch che las clientas ed ils clients pajan per rauba e per servetschs, cuntegna gia la taglia sin la plivalur. L'interpresa che venda la rauba ed ils servetschs, incassescha la taglia sin la plivalur e consegna quella al stadi.
Sche l'interpresa ha stuì cumprar products da basa per producir questa rauba u quests servetschs, po ella deducir la taglia sin la plivalur ch'ella ha pajà per quests products, da la taglia sin la plivalur ch'ella ha incassà da sia clientella e ch'ella sto pajar al stadi. Quai vegn numnà deducziun da la taglia preliminara.
La Confederaziun incassescha la taglia sin la plivalur sin la cumpra da products e da servetschs. Ella n'engrevgescha dentant betg tut ils products tuttina ferm:
Interpresas
Interpresas che fan mintga onn ina svieuta da passa 100 000 francs, ston pajar la taglia sin la plivalur. Ellas ston s'annunziar tar l'Administraziun federala da taglia e scuntrar mintga onn lur svieuta. Cura ch'ellas s'annunzian, survegnan ellas in numer da la taglia sin la plivalur.
Quai vala er per interpresas a l'exteriur, sch'ellas furneschan prestaziuns en Svizra.
Organisaturas ed organisaturs d'occurrenzas
Organisaturas ed organisaturs d'occurrenzas da sport, da cultura u d'autras occurrenzas (p.ex. festa dal vitg u dal quartier) che han lieu mo ina giada, ston scuntrar la taglia sin la plivalur. Quai vala, sch'els gudognan almain 100 000 francs cun vender bavrondas e pasts, cun reclamas e.u.v.
Uniuns
Instituziuns d'utilitad publica ubain uniuns che vegnan manadas en uffizi d'onur e che n'han betg la finamira da rendita, ston s'annunziar per la taglia sin la plivalur a partir d'ina svieuta da 250 000 francs.
Interpresas ch'èn suttamessas a la taglia sin la plivalur ston s'annunziar sezzas per la taglia sin la plivalur tar l'Administraziun federala da taglia. Las interpresas vegnan dirigidas online tras l'annunzia: L'obligaziun da pajar la taglia sin la plivalur vegn sclerida e las interpresas ston inditgar, co ch'ellas vulan scuntrar lur taglia sin la plivalur.
Interpresas pitschnas, organisaturas ed organisaturs d'occurrenzas ubain uniuns pon scuntrar questa taglia en moda pauschala simplifitgada, senza stuair cumprovar la taglia sin la plivalur incassada effectivamain e las deducziuns da la taglia preliminara.
Il rendaquint da la taglia sin la plivalur vegn fatg sin via electronica, per regla mintga mez onn u mintga quartal. L'Administraziun federala da taglia metta a disposiziun instruments da rendaquint en l'internet.
Sin ils quints ston las interpresas inditgar lur numer da la taglia sin la plivalur. Quest numer sa cumpona dal numer d'identificaziun da las interpresas e da la finiziun TPV. Mintga interpresa svizra ha in numer d'identificaziun da las interpresas. Quest IDI pon ins consultar en l'internet.
Per interpresas:
Administraziun federala da taglia: infurmaziuns detagliadas davart la taglia sin la plivalur
Administraziun federala da taglia: post da contact per dumondas davart la taglia sin la plivalur
Administraziun federala da taglia: infurmaziuns fiscalas «taglia sin la plivalur» (pdf)
portal per IPM: infurmaziuns davart la taglia sin la plivalur
Per consumentas e consuments:
cumprar ed empustar rauba a l'exteriur – pajar e restituir la taglia sin la plivalur