Burgais svizzers èn obligads da prestar servetsch militar. Tgi che na po betg prestar servetsch militar u servetsch civil, sto pajar ina taxa da cumpensaziun.
Sulettamain persunas cun in impediment considerabel èn deliberadas da la taxa da cumpensaziun.
Tgi che sposta in curs da repetiziun (CR) e na presta damai betg ses dis da servetsch en in tschert onn, sto er pajar la taxa da cumpensaziun. Uschespert ch’el ha dentant prendì suenter tut ils dis obligatorics da servetsch, po el dumandar la restituziun da la taxa. El po far la dumonda da restituziun tar il chantun er pli tard, dentant il pli tard tschintg onns suenter la relaschada dal servetsch militar.
L’obligaziun da pajar ina taxa per dis da servetsch che mancan cumenza cun la recrutaziun (tranter 19 e 25 onns) e finescha cun 37 onns.
Tgi che na presta ni servetsch militar ni servetsch civil, sto pajar ina taxa durant quest temp –maximalmain 11 onns.
La taxa d’exemziun dal servetsch militar importa annualmain 3 % da las entradas suttamessas a la taglia, sco quai ch’i vegn calculà tar la taglia federala directa. La taxa importa dentant almain 400 francs.
Tgi che presta servetsch da protecziun civila, survegn ina reducziun da 4 % per di da servetsch.