Sche Vus manischais en in stadi alcoholisà, poi svelt vegnir char. En ils pli blers cas stuais Vus pajar custs da procedura e taxas per lavurs d’autoritads e valitaziuns. Vitiers vegnan las suandantas mesiras:
en cas da 0,50 bis 0,79 promils: in avertiment ed in a multa da tranter 600 fin 800 francs. Sche Vus avais ultra da quai surpassà anc autras reglas da traffic (per exempel sche Vus avais surpassa il limit da sveltezza), stuais Vus dar giu il permiss da manischar per almain in mais e quintar cun ina multa auta. L’autezza exacta da quella dependa da Vossa situaziun finanziala.
a partir da 0,80 promils: retratga dal permiss da manischar per almain trais mais ed ina multa auta; l’autezza exacta dependa da Vossa situaziun finanziala e da la quantitad che Vus avais bavì. Ultra da quai survegnis Vus ina multa cundiziunada. En cas da repetiziun survegnis Vus eventualmain in chasti da praschun dad in fin trais onns.
a partir da 1,6 promils: supplementarmain in examen obligatoric d’abilitad da manischar: ina experta u in expert examinescha sche Vus essas eventualmain dependenta u dependent d’alcohol. Vus stuais esser abstinenta u abstinent durant plirs mais e cumprovar quai (a maun d’ina prova da chavels). Il permiss da manischar survegnis vus enavos mo, sche l’experta u l’expert dat glisch verda.
Quant svelt che Vus cuntanschais 0,5 promils dependa tranter auter da quai che Vus bavais, quant svelt che Vus bavais e da Vossa grondezza. Recumandaziuns exactas n’èn betg pussaivlas. N’As fidai perquai betg da calculaturs da promils.
Il meglier èsi, sche Vus desistis dal tuttafatg da baiver alcohol avant che Vus manischais. Gia suenter in magiel biera u vin vesais Vus numnadamain pli mal, reagis pli plaun e ristgais dapli.