Persunas maiorennas
Sche Vus avais almain 18 onns, avais la naziunalitad svizra e vivais en Svizra, pudais Vus As participar a las votaziuns ed a las elecziuns federalas, chantunalas e communalas. Vus pudais er lantschar e suttascriver ina iniziativa dal pievel u ina dumonda da referendum.
Tschertas persunas èn exclusas dal dretg da votar pervia d'in impediment. La Lescha federala davart ils dretgs politics precisescha las cundiziuns da questa exclusiun.
Sche Vus avais Voss domicil en Svizra, na stuais Vus betg As annunziar per As participar a las votaziuns ed a las elecziuns. Vossa vischnanca da domicil As inscriva automaticamain en il register electoral, uschespert che Vus ademplis las cundiziuns necessarias. Infurmaziuns supplementaras chattais Vus sin la pagina da ch.ch «Votar ed eleger per l'emprima giada».
Persunas minorennas
Sin plaun federal pon votar mo las persunas maiorennas. Sin l'agen territori po mintga chantun però conceder il dretg da votar chantunal er a las persunas minorennas. Actualmain permetta mo il chantun Glaruna a las persunas en la vegliadetgna da 16 e 17 onns da votar sin plaun chantunal e communal, però betg da vegnir elegidas.
Las Svizras ed ils Svizzers che vivan a l'exteriur pon sa participar a las votaziuns ed a las elecziuns federalas.
Sche Vus vulais far quai, stuais Vus
As annunziar tar Vossa represchentanza svizra cumpetenta per vegnir inscritta u inscrit en il register dals Svizzers a l'exteriur,
As inscriver en il register electoral da Vossa ultima vischnanca da domicil en Svizra u, sche Vus n'avais mai vivì en Svizra, da Vossa vischnanca d'origin.
Sche Vus n'essas betg As inscritta u inscrit, pudais Vus emplenir online u a l'ambassada il formular da dumonda d'exercitar ils dretgs politics.
En tscherts chantuns pon las Svizras ed ils Svizzers a l'exteriur sa participar a las elecziuns ed a las votaziuns communalas e chantunalas.
Contactai l'autoritad cumpetenta da Voss chantun d'origin per vegnir a savair dapli.
Il Departament federal d'affars exteriurs metta a disposiziun ina charta davart ils dretgs politics da las Svizras e dals Svizzers a l'exteriur sin plaun chantunal.
La dubla naziunalitad n'ha naginas consequenzas per Voss dretg da votar. Sche Vus essas burgaisa dubla u burgais dubel, pudais Vus votar ed eleger sco tut las autras persunas da naziunalitad svizra.
En Svizra na pon persunas estras betg sa participar ni a las votaziuns federalas ni a las elecziuns federalas. Per las votaziuns chantunalas e communalas variescha la situaziun tut tenor ils chantuns e las vischnancas.
Sin plaun chantunal concedan il chantun Giura ed il chantun Neuchâtel il dretg da votar (però betg il dretg da vegnir elegidas) a las persunas estras.
Ch.ch As gida a votar ed ad eleger per l'emprima giada.
Vus pudais consultar la survista dals dretgs politics da las Svizras e dals Svizzers a l'exteriur sin la pagina d'internet dal Departament federal d'affars exteriurs che metta a disposiziun online il formular da dumonda d'exercitar ils dretgs politics.
Las datas da contact da las represchentanzas svizras a l'exteriur chattais Vus online.
Ch.ch porscha in portal spezial per las elecziuns federalas.
Ils chantuns Giura e Neuchâtel concedan il dretg da votar sin plaun chantunal a las persunas estras.