Curtamain
La biodiversitad, pia la diversitad da tut las creatiras e da tut ils spazis da viver, è sa diminuida en Svizra. Er las cuntradas ed ils maletgs dals lieus èn sut squitsch. Perquai protegian la Confederaziun ed ils chantuns ils biotops, las spezias periclitadas sco er ils maletgs dals lieus e las cuntradas preziusas. Els cultiveschan territoris protegids e promovan la biodiversitad, er en l'agricultura. La Confederaziun investescha mintga onn var 600 milliuns francs per mantegnair la diversitad da las spezias. Ultra da quai realiseschan la Confederaziun ed ils chantuns in plan d'acziun per promover la biodiversitad.
Per las iniziantas ed ils iniziants na bastan questas mesiras betg. Ellas ed els vulan proteger supplementarmain la natira, la cuntrada ed il patrimoni construì. L'iniziativa pretenda dapli daners e dapli surfatschas protegidas per la biodiversitad. Ed ella vul particularmain obligar ils chantuns da mantegnair las cuntradas ed ils maletgs dals lieus. Plinavant duain ils elements caracteristics dals biotops, da las cuntradas e dals maletgs dals lieus, ch'èn degns da vegnir protegids, vegnir mantegnids senza restricziuns. La finala vul l'iniziativa schanegiar la natira, la cuntrada ed il patrimoni construì er ordaifer ils territoris protegids.
Recumandaziun dal Cussegl federal e dal parlament: na
Per il Cussegl federal e per il parlament va l'iniziativa memia lunsch. Gia oz vegnan protegids ils biotops, las cuntradas ed ils maletgs dals lieus prezius e vegn promovida la biodiversitad. Sche l'iniziativa vegniss acceptada, restrenschess quai memia fitg tscherts interess impurtants, sco il provediment d'energia, l'agricultura u il svilup dals abitadis.
Recumandaziun dal comité d'iniziativa: gea
Per il comité d'iniziativa è la destrucziun da la natira alarmanta. Er bellas cuntradas e bels maletgs dals lieus vegnian destruids. Las consequenzas per la sanadad, per l'economia e per l'avegnir da noss uffants sajan gravantas. L'iniziativa fetschia frunt a quai. Ella obligheschia la Confederaziun ed ils chantuns da far dapli per nossas basas da viver.
Curtamain
Per bleras persunas è il provediment professiunal (2. pitga) ina cumplettaziun impurtanta da la AVS (1. pitga). Durant lur vita professiunala spargnan ellas cun lur contribuziuns da salari e cun las contribuziuns da lur patruns in dabun da vegliadetgna en la cassa da pensiun. Cun quest dabun vegn pli tard pajada la renta da la cassa da pensiun. Fin ad in tschert import da las entradas prevesa la lescha, quanta renta che sto vegnir pajada sin il pli pauc per mintga franc spargnà. Pervia da retgavs bass sin ils martgads da finanzas e perquai che l'aspectativa da vita crescha, n'èn las rentas da l'uschenumnada part obligatorica però betg pli finanziadas suffizientamain. Pertutgadas da quai èn spezialmain las cassas da pensiun che porschan mo il minimum prescrit tras lescha u pauc dapli. Vitiers vegn in segund problem: Tgi che gudogna pauc, n'ha pli tard nagina u mo ina fitg pitschna renta ord la cassa da pensiun. Pertutgadas da quai èn surproporziunalmain bleras dunnas, perquai ch'ellas lavuran savens a temp parzial u en branschas cun pajas bassas.
La refurma prevesa mesiras che permettan da finanziar en moda pli segira las rentas futuras. Plinavant vegnan bleras persunas cun entradas bassas a retschaiver pli tard ina renta pli auta: Ellas e lur patruns pajan per quai mintga mais contribuziuns da spargn pli autas che oz. La gronda part da las lavurantas e dals lavurants ha ina cassa da pensiun che porscha cleramain dapli che las prestaziuns minimalas prescrittas tras lescha. En quest reguard ha la refurma mo pitschnas consequenzas per els. Las rentas da las persunas ch'èn gia pensiunadas, n'èn betg pertutgadas da la refurma.
Recumandaziun dal Cussegl federal e dal parlament: gea
Per il Cussegl federal e per il parlament è la refurma necessaria, per che las rentas futuras dal provediment professiunal obligatoric sajan puspè finanziadas suffizientamain ed a lunga vista. Persunas che gudognan pauc èn segiradas meglier en la vegliadetgna. Da quai profiteschan cunzunt las dunnas.
Recumandaziun dal comité da referendum: na
Tenor il comité sa diminueschan las rentas da las cassas da pensiun dapi onns e per bleras lavurantas e lavurants èn ellas memia bassas. Cun la refurma smanatschian ulteriuras reducziuns da rentas. Las persunas assicuradas pajan dapli, ma survegnian ina renta pli pitschna. Percunter prelevia l'industria da finanzas milliardas – sin donn e cust da las persunas assicuradas.
Sin admin.ch, la pagina d'internet uffiziala dal Cussegl federal, e sin l'app VoteInfo, chattais Vus infurmaziuns e links davart ils temas dals projects da votaziun.